“Qalatasaray” derbidə “Fənərbaxça”nı məğlub etdi - Osimhen dubl etdi
Türkiyə Super Liqasının IX turunda İstanbulun əzəli rəqibləri “Qalatasaray” və “Fənərbaxça” komandaları üz-üzə gəlib. RAMS Parkda keçirilən qarşılaşmada meydan sahibləri 2:1 hesabı ilə qalib gəliblər.
Redaktor.az xəbər verir ki, matça fəal başlayan “Qalatasaray” ilk hissədə rəqibindən üstün oyun nümayiş etdirib. Sarı-qırmızılılar hücumlarının qarşılığını iki qolla alıblar.
Görüşün 29-cu dəqiqəsində Barış Alper Yılmazın ötürməsindən sonra Viktor Osimhen rəqib qapısına yol taparaq hesabı açıb. Nigeriyalı hücumçu 44-cü dəqiqədə yenidən fərqlənib. Davinson Sançesin zərbəsindən sonra topa başla toxunan Osimhen dublunu rəsmiləşdirib və komandasının üstünlüyünü iki topa çatdırıb.
Beləliklə, qarşılaşmanın ilk hissəsi “Qalatasaray”ın 2:0 hesablı üstünlüyü ilə başa çatıb.
“Fənərbaxça” fərqi azaltsa da, məğlubiyyətdən qaça bilmədi
İkinci hissədə hesabı dəyişmək üçün hücumlarını artıran “Fənərbaxça” 62-ci dəqiqədə istəyinə çatıb. İrfan Can Kahveci baxımlı zərbə ilə topu rəqib qapısından keçirərək hesab arasındakı fərqi minimuma endirib - 2:1.
Qoldan sonra qonaqlar bərabərlik qolunu vurmaq üçün cəhdlərini davam etdiriblər. “Qalatasaray” isə əldə etdiyi üstünlüyü qorumağa çalışıb. Qarşılaşmanın son dəqiqələrində hər iki komandanın mübarizəsinə baxmayaraq, hesab dəyişməyib.
Beləliklə, İstanbul derbisində qələbə “Qalatasaray”ın olub. Meydan sahiblərinin iki qolunu da Viktor Osimhen vurub, “Fənərbaxça”nın yeganə qolunun müəllifi isə İrfan Can Kahveci olub.
Turnir cədvəlində vəziyyət
Bu qələbədən sonra “Qalatasaray” xallarının sayını 22-yə çatdıraraq turnir cədvəlində liderliyini möhkəmləndirib. “Fənərbaxça” isə 9 turdan sonra 16 xalla beşinci pillədə qərarlaşıb.
Derbidə qazanılan üç xal “Qalatasaray”ın çempionluq mübarizəsində mövqeyini gücləndirib. “Fənərbaxça” isə rəqibinin meydanından xalsız ayrılıb.
Turan ASLAN
Bizi Telegram-da izləyin...
