"Barselona" rəqibinə şans vermədi - ÇL-də darmadağın
UEFA Çempionlar Liqasının liqa mərhələsində "Barselona" və "Aston Villa" komandaları arasında keçirilən qarşılaşma Kataloniya təmsilçisinin 3:0 hesablı qələbəsi ilə başa çatıb.
Redaktor.az xəbər verir ki, oyuna fəal başlayan "Barselona" artıq 7-ci dəqiqədə hesabı açıb. Lamine Yamal rəqib qapısına yol taparaq komandasını önə keçirib. Erkən qol kataloniyalıların qarşılaşmada üstünlüyü ələ almasına imkan yaradıb.
İkinci hissədə də üstün oyununu davam etdirən "Barselona" 52-ci dəqiqədə fərqi artırıb. Fermin Lopesin ötürməsindən sonra Rafinya dəqiq zərbə ilə hesabı 2:0 edib.
Matçın 64-cü dəqiqəsində isə braziliyalı futbolçu yenidən fərqlənib. Joao Kanselonun məhsuldar ötürməsini qolla tamamlayan Rafinya dubl edərək komandasının üçüncü qolunu vurub və qarşılaşmada yekun hesabı müəyyənləşdirib.
Görüşün statistik göstəriciləri də "Barselona"nın üstünlüyünü təsdiqləyib. Kataloniya klubu topa sahibolmada 65 faizlik göstərici ilə rəqibini üstələyib. "Aston Villa"nın bu göstəricisi 35 faiz olub.
Çərçivəyə zərbələrdə də ciddi fərq qeydə alınıb. "Barselona" 8 dəfə rəqib qapısına dəqiq zərbə endirdiyi halda, İngiltərə təmsilçisi cəmi bir dəfə qapı çərçivəsini nişan ala bilib.
Gözlənilən qol (xG) göstəricisində də üstünlük İspaniya klubunun tərəfində olub. "Barselona"nın xG göstəricisi 1,92, "Aston Villa"nın isə 0,72 təşkil edib.
Beləliklə, "Barselona" qarşılaşmanı üç cavabsız qolla başa vurub. Rafinya dublu ilə qələbənin əsas qəhrəmanlarından biri olub.
Turan ASLAN
Bizi Telegram-da izləyin...
