İrəvanda heç-heçə: Ermənistan şanslarını itirdi
UEFA Millətlər Liqasının C Liqasının II qrupunda V turun oyunları çərçivəsində Ermənistan və Kipr milli komandaları üz-üzə gəlib.
Redaktor.az xəbər verir ki, noyabrın 12-də İrəvandakı Vazgen Sarkisyan adına Respublika Stadionunda keçirilən qarşılaşma 1:1 hesabı ilə başa çatıb.
Görüşə daha fəal başlayan qonaqlar artıq 9-cu dəqiqədə hesabı açıblar. İoannis Pittasın ötürməsindən sonra İasonas Pikis dəqiq zərbə ilə Kipr millisini önə keçirib. İlk hissə qonaqların minimal üstünlüyü ilə yekunlaşıb.
Fasilədən sonra hücumlarını artıran Ermənistan millisi 58-ci dəqiqədə istəyinə çatıb. Artur Serobyanın ötürməsini Artur Qaribyan dəqiq tamamlayaraq hesabda tarazlığı bərpa edib – 1:1.
Qalan dəqiqələrdə komandaların səylərinə baxmayaraq, hesab dəyişməyib və tərəflər hərəyə bir xalla kifayətləniblər.
Oyunun statistikası
Qarşılaşma ərzində Ermənistan millisi topa sahibolma və qapıya dəqiq zərbələrin sayına görə rəqibini üstələyib. Meydan sahibləri topa 69 faiz sahib olub, Kiprdə isə bu göstərici 31 faiz təşkil edib. Qapıya dəqiq zərbələrdə də Ermənistan 7:2 hesabı ilə üstün olub.
Bununla belə, meydan sahibləri statistik üstünlüyü qələbəyə çevirməyi bacarmayıblar.
Komandaların turnirdəki vəziyyəti
Ermənistan millisi bu qarşılaşmaya qədər keçirdiyi dörd oyunda bir qələbə, bir heç-heçə və iki məğlubiyyətlə 4 xal toplamışdı. Komanda turnirə Latviya üzərində 2:0 hesablı qələbə ilə başlasa da, sonrakı görüşlərdə Monteneqroya 2:3, Kiprə isə 0:2 hesabı ilə uduzmuş, Monteneqro ilə səfər oyununda isə qolsuz heç-heçə etmişdi.
Kipr millisi isə dörd turdan sonra 7 xalla qrupun ikinci pilləsində qərarlaşmışdı. Komanda Monteneqroya 1:2 hesabı ilə məğlub olmuş, Latviya ilə qolsuz heç-heçə etmiş, Ermənistanı 2:0, Latviyanı isə 2:1 hesabı ilə məğlub etmişdi.
İrəvandakı heç-heçədən sonra Kipr xallarının sayını 8-ə, Ermənistan isə 5-ə çatdırıb. Beləliklə, Kipr qrupun ikinci pilləsindəki mövqeyini qoruyub, Ermənistan isə üçüncü yerdə qalıb.
Qeyd edək ki, bu nəticə Ermənistan millisinin B Liqasına yüksəlmək şanslarını da rəsmən bitirib. Komanda son turda qələbə qazansa belə, Kiprlə xallarını bərabərləşdirəcəyi halda şəxsi qarşılaşmanın nəticəsinə görə rəqibini qabaqlaya bilməyəcək.
Qrup mərhələsinin sonuncu turunda noyabrın 15-də Ermənistan səfərdə Latviya ilə qarşılaşacaq. Kipr isə doğma meydanda Monteneqronu qəbul edəcək.
Turan ASLAN
Bizi Telegram-da izləyin...
