Tarixi rekorda bir addım qalıb...
ABŞ-nin "İnter Mayami" klubunun argentinalı ulduzu və kapitanı Lionel Messi ardıcıl üçüncü dəfə Şimali Amerika Böyük Futbol Liqasında (MLS) mövsümün ən yaxşı futbolçusu (MVP) mükafatına namizədlər sırasına daxil edilib.
Redaktor.az xəbər verir ki, MLS-in rəsmi saytının yaydığı məlumata görə, 39 yaşlı hücumçu 2026-cı il mövsümünün yekunları üzrə təqdim olunan "Landon Donovan MLS MVP" mükafatının beş finalçısından biri olub.
Finalçılar klubların texniki heyətinin nümayəndələri, futbolçular və seçilmiş media təmsilçilərinin iştirakı ilə keçirilən səsvermə nəticəsində müəyyənləşib. Messi ilə yanaşı, aşağıdakı futbolçular da mükafatın final mərhələsinə yüksəlib:
- Evander ("Sinsinnati");
- Gilyerme ("Hyuston Dinamo");
- Hani Muxtar ("Neşvill");
- Kavan Sallivan ("Filadelfiya Yunion").
Messi MLS tarixində ilkə imza ata bilər
Qeyd edək ki, Lionel Messi 2024 və 2025-ci illərdə də MLS-in ən dəyərli oyunçusu mükafatına layiq görülüb. Argentinalı ulduz 2026-cı ildə də qalib gələcəyi təqdirdə, liqa tarixində bu mükafatı üç dəfə qazanan və bunu ardıcıl üç mövsümdə bacaran ilk futbolçu olacaq.
Maraqlı məqamlardan biri də Messinin rəqibləri arasında 17 yaşlı Kavan Sallivanın yer almasıdır. Gənc futbolçu MVP mükafatının finalçıları sırasına düşməklə MLS tarixində bu mərhələyə yüksələn ən gənc oyunçu və ilk yeniyetmə kimi tarixə düşüb.
Messinin 2026-cı il mövsümündəki möhtəşəm statistikası
Lionel Messi namizədliyini mövsüm ərzində nümayiş etdirdiyi yüksək performansla doğruldub. "İnter Mayami"nin yaydığı məlumat və liqanın statistik göstəricilərinə əsasən, argentinalı futbolçu 2026-cı il MLS-in müntəzəm mövsümündə meydana çıxdığı 31 oyunda 26 qola imza atıb.
Bununla da o, ardıcıl ikinci dəfə liqanın ən yaxşı bombardiri üçün təqdim olunan "Qızıl buts" mükafatını qazanıb.
Messi mövsüm ərzində komanda yoldaşlarının 17 qoluna da məhsuldar ötürmə ilə töhfə verib. Opta statistikasında rəsmi assistlərin sayı 13 göstərilsə də, ümumi göstərici üzrə argentinalı ulduzun aktivində 43 qol töhfəsi qeydə alınıb. Bu nəticə onu liqanın ən məhsuldar futbolçusu edib.
Bundan başqa, Messi mövsüm ərzində 13 dəfə MLS-in "Turun rəmzi komandası"na daxil edilib, 7 dəfə isə "Turun ən yaxşı qolu" mükafatına layiq görülüb.
Qeyd edək ki, 2026-cı il MLS mövsümünün fərdi mükafatlarının qalibləri hazırda davam edən MLS Cup pley-off mərhələsi çərçivəsində mərhələli şəkildə açıqlanacaq. Messi isə karyerasında növbəti tarixi uğura imza atmaq və MLS-də ardıcıl üçüncü MVP mükafatını qazanmaq şansını qoruyur.
Turan ASLAN
Bizi Telegram-da izləyin...
