Moldova Qazaxıstanı məğlub etdi - UEFA Millətlər Liqası
UEFA Millətlər Liqasının C Liqasının 3-cü qrupunun V turunda Moldova millisi doğma meydanda Qazaxıstan yığmasını 2:1 hesabı ilə məğlub edib.
Redaktor.az xəbər verir ki, Kişinyov şəhərindəki "Zimbru" stadionunda keçirilən qarşılaşmada ilk qol 39-cu dəqiqədə vurulub. Petru Popesku meydan sahiblərini hesabda önə çıxarıb.
İkinci hissənin 51-ci dəqiqəsində İslam Çesnokovun qolu ilə Qazaxıstan hesabı bərabərləşdirib. Ramazan Orazovun məhsuldar ötürməsindən sonra vurulan qol qonaqlara ümid versə də, Moldova qələbə qazanmağı bacarıb.
Görüşün 77-ci dəqiqəsində Nikita Motpanın ötürməsini dəqiq tamamlayan Petru Popesku özünün ikinci, komandasının isə qələbə qolunu vurub.
Qazaxıstan millisi qarşılaşmanın əlavə olunmuş vaxtında azlıqda qalıb. Maksim Samorodov 90+4-cü dəqiqədə ikinci sarı vərəqəni alaraq meydandan qovulub.
Qeyd edək ki, bu qələbədən sonra Moldova xallarının sayını 7-yə çatdırıb. Komanda qrupda ikinci pillə uğrunda mübarizədə mövqeyini möhkəmləndirib.
Qazaxıstan isə 4 xalla qrupun sonuncu pilləsində qərarlaşıb. Moldova oktyabr ayında keçirilən ilk görüşdə də rəqibini 2:1 hesabı ilə məğlub etmişdi. Beləliklə, Moldova hər iki qarşılaşmada Qazaxıstan üzərində qələbə qazanıb.
Turan ASLAN
Bizi Telegram-da izləyin...
