Macarıstan səfərdə Gürcüstana qalib GƏLDİ
UEFA Millətlər Liqasının qrup mərhələsi çərçivəsində Gürcüstan və Macarıstan milli komandaları üz-üzə gəliblər. Gərgin mübarizə şəraitində keçən qarşılaşma qonaqların 2:0 hesablı qələbəsi ilə yekunlaşıb.
Redaktor.az xəbər verir ki, matçın ilk hissəsində tərəflərin cəhdlərinə baxmayaraq, qapılara qol vurulmayıb və komandalar fasiləyə 0:0 hesablı heç-heçə ilə yollanıblar. İlk yarıda yeganə diqqətçəkən məqam 18-ci dəqiqədə Macarıstan millisinin müdafiəçisi Villi Orbanın sarı vərəqə ilə cəzalandırılması olub.
İkinci hissədə də tərəflər mübarizəni davam etdiriblər. 51-ci dəqiqədə qonaqlardan Milan Vitalis, 60-cı dəqiqədə isə meydan sahiblərindən Georgi Tsitaişvili sarı vərəqə alıblar. Görüşdə hesab yalnız 73-cü dəqiqədə açılıb. Gürcüstan millisinin futbolçusu Laşa Dvali topu öz qapısına göndərərək Macarıstanı hesabda önə çıxarıb — 0:1.
Buraxılan qoldan sonra Gürcüstan yığmasının baş məşqçisi 77-ci dəqiqədə ardıcıl üç əvəzetmə edərək oyuna müdaxilə etməyə çalışsa da, bu, nəticəni dəyişməyib. Əksinə, 85-ci dəqiqədə Dominik Soboslainin məhsuldar ötürməsini dəqiq tamamlayan Barnabaş Varqa fərqi ikiyə çatdıraraq matçda son nöqtəni qoyub — 0:2.
Beləliklə, Macarıstan millisi səfərdən vacib 3 xalla ayrılıb.
Turan ASLAN
Bizi Telegram-da izləyin...
