TikTok uşaq və yeniyetmələr üçün istifadə vaxtını məhdudlaşdıracaq
TikTok uşaqların və yeniyetmələrin sosial şəbəkədə keçirə biləcəyi vaxtı məhdudlaşdırmağa yönəlmiş bir neçə funksiya əlavə edəcək.
Redaktor.az xəbər verir ki, müvafiq bəyanat çərşənbə günü şirkətin saytında yerləşdirilib.
Məsələn, 18 yaşından kiçik istifadəçiyə məxsus hər hesabda avtomatik olaraq gündə 60 dəqiqəlik ekran vaxtı limiti olacaq. Göstərilən limitə çatdıqda, yeniyetmələrdən sosial şəbəkədən istifadəni davam etdirmək üçün parol daxil etmələri tələb olunacaq. 13 yaşdan kiçik istifadəçilər də 60 dəqiqə ilə məhdudlaşdırılacaq. Valideynləri və ya qəyyumları parol təyin edərsə və ya daxil edərsə, onlar videoya baxmaq üçün əlavə 30 dəqiqə vaxt əldə edə bilərlər.
Bundan əlavə, sosial şəbəkə yeniyetmələrə TikTok-a sərf etdikləri vaxt haqqında həftəlik hesabatlar göndərəcək.
Həmçinin sosial şəbəkə “Ailə parametrləri”ndə yeni funksiyalar təqdim edəcək. Məsələn, yetkinlik yaşına çatmayan istifadəçilərin valideynləri və ya qəyyumları onlar üçün TikTok istifadə limitini, o cümlədən həftənin gününə görə fərqli vaxt limitini təyin edə biləcəklər. Bundan əlavə, TikTok tətbiqin neçə dəfə açıldığı, gecə-gündüz sosial şəbəkədə vaxt keçirməsi barədə məlumat verəcək. Bundan əlavə, valideynlər yeniyetmələr üçün sosial şəbəkədən bildirişlərin söndürülməsi üçün qrafik təyin edə biləcəklər. İndi 13-15 yaş arası istifadəçilər saat 21:00-dan, 16-17 yaşlı yeniyetmələr saat 22:00-dan etibarən bildiriş almır.
Şirkət həmçinin elan edib ki, tezliklə ekran vaxtının məhdudlaşdırılması və bildirişlərin söndürülməsi funksiyaları bütün istifadəçilər üçün əlçatan olacaq.
Qeyd edək ki, qısa videoları yükləməyə imkan verən TikTok 2017-ci ildə, beynəlxalq versiyası isə 2018-ci ilin avqustunda istifadəyə verilib. Şəbəkənin sahibi Çinin ByteDance texnologiya şirkətidir.
Turan İSMAYIL
Bizi Telegram-da izləyin...
