"Xiaomi" təzyiq və temperaturu ölçən saat təqdim etdi
Çinin “Xiaomi” şirkəti qan təzyiqi və temperaturun monitorinqi ilə təchiz olunmuş ilk “ağıllı” saatını təqdim edib. "Watch H1 E" adlanan model artıq Çində satışdadır və tezliklə beynəlxalq bazara çıxacağı gözlənilir.
Redaktor.az xəbər verir ki, bu barədə “IT-Home” məlumat yayıb.
"Watch H1 E"nin əsas xüsusiyyəti günün istənilən vaxtında qan təzyiqinə nəzarət etmək imkanıdır ki, bu da hipertoniyanın inkişaf riskinin qarşısını almağa kömək edəcək. Qan təzyiqini ölçmək üçün sfiqmomanometr manşetinə bənzər xüsusi şişirdilmiş qayış mexanizmi istifadə olunur. Ölçmə zamanı saatı taxdığınız əli sinənizin üstünə qoymalı və digər əlinizlə dirsəyinizi tutmalısınız.
"Watch H1 E" Pekin Bələdiyyə Dərman İdarəsi tərəfindən II dərəcəli tibbi cihaz kimi sertifikatlaşdırılıb. Dəqiq məlumat əldə etmək üçün gündə bir dəfə ölçmə aparmaq kifayətdir və ağıllı saatın özü sizə bunun ehtiyacını xatırladacaq. Təzyiqdən əlavə, saatda nəbz, qan oksigenlə doyma, bilək temperaturu, elektrokardioqram, damar elastikliyi, nəbz dalğası, aritmiya simptomları və bir çox digər məlumatlar göstərilir.
"Xiaomi Watch H1 E"nin texniki xüsusiyyətlərinə 466 x 466 piksel təsvir ölçüsünə və 60 Hz yeniləmə tezliyinə malik 1,43 düymlük AMOLED displey, həmçinin "həmişə açıq ekran" rejimi daxildir. Akkumulyatorun tutumu 500 milliamper/saatdır və bir dəfə doldurulmaqla 9 günə qədər istifadəni təmin edir. Ağıllı saat 100-dən çox məşqi dəstəkləyir və simsiz rabitə üçün Wi-Fi, Bluetooth, NFC və GPS modulları ilə təchiz edilib. IP68 standartına uyğun olaraq su və toza qarşı qorunma var.
Çində "Watch H1 E" smart saatının qiyməti 1,9 min yuandır.
Sevinc İBRAHİMZADƏ
Bizi Telegram-da izləyin...
