Üç Ayfon modeli satışdan erkən çıxarıldı
Əpl Avropa Birliyinin yeni qanunvericiliyinə uyğun olaraq Ayfon14, Ayfon 14 Plus və Ayfon SE (2022) modellərinin Avropadakı rəsmi mağazalardakı satışını dayandırıb. Əslində, bu modellərin satışda qalması 17-ci seriyanın buraxılışına qədər planlaşdırılmışdı.
Redaktor.az valyuta.az-a istinadən xəbər verir ki, bu barədə "MacRumors" məlumat yayıb.
Qeyd olunan Ayfon modellərində "Lightning" portunun mövcudluğu əsas səbəbdir. 2025-ci ilin yanvarından etibarən Avropa İttifaqında yeni qaydalar qüvvəyə minəcək. Bu qaydalara əsasən, istehsalçılar yalnız USB-C portuna malik olan smartfonları satışa çıxara bilərlər.
Əpl artıq USB-C portuna malik iki yeni Ayfon seriyası təqdim edib və aksesuarlarını da yeniləyib. Lakin köhnə modellər hələ satışda idi. Şirkət bu modelləri yeni port ilə təkrar istehsal etməyi planlaşdırmır və sadəcə onların satışını dayandırmağı qərara alıb.
Ayfon modelləri ilə yanaşı, USB-C portuna malik olmayan bəzi "Magic-aksesuarlar" da Avropa bazarından çıxarılıb. Bununla belə, Avropa İttifaqından kənar bazarlarda, məsələn, ABŞ-da Ayfon 14 və SE (2022) modellərinin satışı davam edir. Ekspertlər qeyd edir ki, bu cihazların sayı azaldıqca qiymətləri də yüksələ bilər.
2025-ci ilin yazında USB-C portuna malik yeni Ayfon SE modeli təqdim ediləcək. Bu cihazın Ayfon 14-ün dizaynını mənimsəyəcəyi, lakin "iPhone 16" prosessoru ilə təchiz ediləcəyi gözlənilir.
Payızda isə Afyon 17 seriyası təqdim olunacaq. Şayiələrə görə, bu model xətti son illərin ən maraqlı yeniliklərindən biri olacaq. Xüsusilə, Ayfon 17 Air modeli diqqət mərkəzindədir. Bu modelin ultra nazik dizayna malik olacağı və fiziki SIM kart yuvasının olmayacağı bildirilir.
Bizi Telegram-da izləyin...
