Daha çox hansı mobil operatordan imtina edilib və hansı operatorlar seçilib?
Azərbaycanda 10 ildən çoxdur ki, mobil nömrə daşınması xidməti aktivdir. Yəni hansısa bir mobil operatorun abunəçisi öz nömrəsini necə varsa olduğu kimi saxlamaqla digər bir operatorun şəbəkəsinə keçirə bilir. Daşınmadan sonra nömrə tam olduğu kimi qalır, amma başqa bir mobil operator ona xidmət göstərir.
Maraqlıdır görəsən hazırda bu sahədə statistika necədir? Daha çox kimlərdən, hansı operatorlardan imtina edilib və daha çox hansı mobil operator seçilib? "Azercell"dən imtina edənlər "Bakcell"i , yoxsa "Nar"ı seçib? "Bakcell"dən imtina edənlər "Azercell"i, yoxsa "Nar"ı seçib? Görəsən nömərisni başqasına daşıdıqdan sonra yenidən əvvəlki operatoruna qayıdanlar olubmu?
Redaktor.az xəbər verir ki, bu barədə "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz danışıb.
O, düşünür ki, bütün bunlar yetərincə ictimai əhəmiyyət kəsb edən statistikadır:
"Yəni “hansından imtina edilib, hansı seçilib” məsələsi mobil operatorlardan narazılıq səviyyəsini, xidmətlərin keyfiyyəti ilə bağlı vəziyyəti öyrənmək üçün əhəmiyyətli bir indeksdir.
Əlbəttə mobil operatorlara belə statistikanı açıqlamaq maraqlı deyil. Amma bu statistikanı İKTA təqdim edə bilər, daha doğrusu bu tip məlumatları İKTA açıqlamalıdır.
Ötən müddət ərzində İKTA internet xidmətləri sahəsində, internet provayderləri ilə bağlı ictimai nəzarət imkanlarının yaradılması istiqamətində müəyyən faydalı işlər görüb. Rəqəmsal platforma yaradıb və bu sektorla bağlı ictimai əhəmiyyətli məlumatları da zaman-zaman açıqlayır. Amma bu qurumun mobil operatorlara yönəlik tənzimləyici addımları, ictimai nəzarət üçün imkanlarlar yarada biləcək addımlar hələlik müşahidə olunmur".
Osman Gündüz hesab edir ki, İKTA tərəfindən mobil operatorlar arasında nömrə daşınması statistikasını real olaraq əks etdirən bir platformanın yaradılması faydalı olardı.
"Bu statistikanın açıqlanması keyfiyyətsiz xidmətləri olan operatorlar üzərində ictimai qınağın formalaşdırılması, ictimai nzəarət imkanların yaradılması baxımından da əhəmiyyət kəsb edir", - deyə o qeyd edib.
Turan İSMAYIL
Bizi Telegram-da izləyin...
