Gürcüstan-Rusiya gərginliyi Azərbaycan turizminə NECƏ TƏSİR EDƏCƏK?
Son günlər Gürcüstan və Rusiya arasında gərginlik yaşanır.
Bu gərginliyin bir çox sahələrlə yanaşı, turizm sektoruna da təsir edəcəyi proqnozlaşdırılır.
Görəsən, Gürcüstan-Rusiya gərginliyi fonunda turist axını Azərbaycana yönələ bilərmi?
Azərbaycan Dövlət İqtisad Universitetinin (UNEC) professoru Elşad Məmmədov Redaktor.az-a açıqlamasında bildirib ki, bu prosesdə Azərbaycanın əldə edəcəyi mənfəət az olacaq. Buna səbəb isə ölkənin turizm sahəsində bir sıra nöqsanların olmasıdır:
"Gürcüstan-Rusiya münasibətlərində yaşanan gərginlik Azərbaycanın turizm bazarının inkişafı ilə bağlı yeni imkanlar yaradır. Çünki hər iki ölkə arasındakı gərginlik turizm dövrünün pik vaxtlarına təsadüf edir. Rusiya-Gürcüstan gərginliyi fonunda böyük turist axını daha çox Türkiyəyə yönələcək. Ona görə də prosesdən ən çox mənfəət götürən ölkə məhz Türkiyə olacaq. Çünki Azərbaycandan fərqli olaraq, qonşu Türkiyədə turizm sektorunun bütün sahələri inkişaf edib. Azərbaycana gələn rus turistləri, əsasən Türkiyəyə gedə bilməyənlər təşkil edəcək".
E. Məmmədov vurğulayıb ki, böyük turist axının olması üçün ölkədə turizm sektorunun inkişafı ilə bağlı konkret işlər görülməlidir:
"Azərbaycanda turizm infrastrukturunun inkişafı ilə bağlı müəyyən problemlər var. Əsas ciddi problem ölkədə orta və az qabiliyyətli ödəməyə malik turizm seqmentlərinin olmamasıdır. Eyni zamanda, xidmət səviyyəsi lazımi səviyyədə yüksək deyil. Bu, bütün turizm obyektlərinə aid olmasa da, hotellərin çoxunda məlum vəziyyət hökm sürür. Turizmin inkişafı ilə bağlı əyləncə infrastrukturunun yaradılmasına da ehtiyac var. Həmçinin turizm sahəsinin inkişafı üçün ölkədə əlverişli pul-kredit və investisiya siyasəti həyata keçirilməlidir. Hazırda bu məsələlərlə bağlı addımlar atılmır. Bu baxımdan il ərzində Rusiyadan ölkəmizə turist axının yüksək olacağını gözləmək real deyil".
Qeyd edək ki, Gürcüstanda yaranan gərginlik rusiyalı deputatın ölkənin parlament kürsüsündə əyləşməsi ilə başlayıb. Bu fonda yaranan gərginlik kütləvi etirazlara və Gürcüstan-Rusiya münasibətlərinin soyuqlaşmasına səbəb olub.
Gülşən Şərif / Redaktor.az
Bizi Telegram-da izləyin...
