Kanada İranın təzminat təklifini qəbul etmədi

 22:05 07.01.2021     105

Kanada İranda Ukraynaya məxsus “Boeing 737”  təyyarəsinin vurulmasına görə, ölən kanadalı vətəndaşlar üçün İran hökumətinin təzminat təklifini rədd edib. 

Redaktor.az  xəbər verir ki, İran həmin hadisəyə görə ölənlərin ailələrinə 150 min ABŞ dolları təzminat ödəyəcəyi ilə bağlı təklif planı hazırlayıb.

Vurulan Ukrayna təyyarəsi ilə bağlı kanadalı xüsusi müşavir Ralf Qudale İranın birtərəfli qaydada təzminat təklif etmək haqqına sahib olmadığını bildirib.

Onun sözlərinə görə, təzminat məsələsində İran və Kanada ilə yanaşı, qəzada vətəndaşlarını itirən digər dörd ölkənin də müzakirələrə qoşulmalıdır. Kanada bu səbəbdən İranın təzminat təklifi ilə razılaşmır. 

Xatırladaq ki, Ukrayna Hava Yollarına məxsus “Boeing 737”  tipli sərnişin təyyarəsi 8 yanvar 2020-ci ildə Kiyevə getmək üçün Tehranın İmam Xomeyni Beynəlxalq Hava Limanından qalxdıqdan bir müddət sonra vurulub. Hadisədən sonra göyərtədəki 176 sərnişin və heyət üzvlərindən sağ qalan olmayıb. İranın Baş Qərargahı verdiyi açıqlamada təyyarənin hərbi nöqtəyə yaxınlaşması kimi qəbul edildiyini və səhvən vurulduğunu açıqlayıb.

Ukrayna Xarici İşlər Nazirliyi hadisədə 63 kanadalının həyatını itirdiyini açıqlasa da, 57 nəfərin ölməsi tam təsdiqini tapıb. //Qafqazinfo