Qazaxıstanda qazı bahalaşdıran zavod direktoru saxlanıldı

 11:02 05.01.2022     7357

Qazaxıstanın Manqistau vilayətinin Janaozen rayonundakı “Kazak qaz ondeu” təbii qaz emalı zavodunun direktoru saxlanılıb.

Redaktor.az xarici mətbuata istinadən xəbər verir ki, direktorla birlikdə maye qazın elektron ticarəti bölməsinin rəhbəri də saxlanılıb.

Məlumata görə, zavod direktoru heç bir səbəb olmadan təbii qazın qiymətini bahalaşdırıb.

Bildirilir ki, sözügedən zavod Manqistau vilayətini və Qazaxıstanın əsas hissəsini maye qazla təmin edir. Maliyyə Monitorinqi Agentliyi bu faktla bağlı araşdırma aparır.

Qeyd edək ki, Manqistau vilayətinin Aktau, Janaozen və bir neçə rayonunda yanvarın 2-dən kütləvi etiraz aksiyaları keçirilir. Buna səbəb nəqliyyat vasitələri üçün maye qazın kəskin bahalaşması olub. Etirazçıların sözlərinə görə, yanvarın 1-dən maye qazın bir litrinin qiyməti 120 təngəyə (0,27 dollar) qalxıb, sakinlər onun 60 təngəyə (0,13 dollar) endirilməsini tələb ediblər.

Nuranə Tofiqli