Polşanın Baş nazirindən Avropa İttifaqına: "Saxta jestlər və qaçış taktikası yetər"
Polşanın Baş naziri Mateuş Moravietski Ukraynanın Kiyev vilayətində Rusiyanın hərbi cinayətlərini nəzərdən keçirmək və təsirli sanksiyalar tətbiq etmək üçün Avropa İttifaqı (Aİ) üzvlərini mümkün qədər tez toplaşmağa çağırıb.
Redaktor.az-ın məlumatına görə, bu barədə hökumət rəhbəri özünün feysbuk səhifəsində yazıb.
Mateuş Moravietski eyd edib ki, Rusiya işğalçılarının Buçada və Kiyev vilayətinin digər yaşayış məntəqələrində törətdikləri cinayətlər soyqırım adlandırılmalı, onlara görə birbaşa və ya dolayısı ilə məsuliyyət daşıyan hər kəs Beynəlxalq Tribunal tərəfindən ciddi şəkildə cəzalandırılmalıdır.
"Buçadakı qətliam Avropa və dünya üçün oyanış çağırışından daha çox şeydir. Bu, ədalət, azadlıq və yaşamaq hüququ; təməl və ümumbəşəri dəyərlər üçün dəhşətli fəryaddır", - o, bildirib.
Baş nazir Aİ-ni Rusiyanın oliqarxları da daxil olmaqla, bu ölkənin Qərb banklarındakı bütün səhmlərini müsadirə etməyə çağırıb. O, Rusiya ilə bütün ticarət əlaqələrinin dərhal kəsilməsinin və Avropa pullarının Kremlə axınının dayandırılmasının vacibliyini qeyd edib.
Mateuş Moravietski hesab edir ki, Ukrayna Mariupol, Buça və digər şəhərlərin qadın və uşaqlarını qoruya biləcək silahlar almalıdır:
"Bu, bizim siyasi və mənəvi borcumuzdur. Saxta jestlər və qaçış taktikası yetər. Bəsdir! Sanksiyalar heç bir nəticə vermir. Rusiyanın həyata keçirdiyi soyqırımın oksigenini kəsin".
Bizi Telegram-da izləyin...
