Bu ölkələrin müstəqilliyinin tanınması geri götürülə bilər - Rusiyalı deputat hədələdi

 10:35 14.06.2022     223

“Rusiya Federasiyası gələcəkdə Latviya, Estoniya və Ukrayna kimi ölkələrə müstəqilliklərinin tanınmasının geri götürülməsini şamil edə bilər”.

Redaktor.az xəbər verir ki, bu barədə Rusiya Dövlət Dumasının deputatı Yevgeni Fyodorov deyib.

“Biz Litva ilə bunu yenicə başlamışıq. Niyə olduğu da aydındır - Litva Kalininqrad bölgəsi ilə bağlı vəziyyət, NATO və ABŞ-la qarşıdurma baxımından Rusiya Federasiyası üçün daha təhlükəlidir. Buna görə də indi Litva daha vacibdir, lakin o demək deyil ki, biz bununla dayanacağıq”, - deputat qeyd edib.

O bildirib ki, Litvanın seçilməsi onunla bağlı yaranmış vəziyyətdə “Müttəfiq respublikanın SSRİ-dən çıxması ilə bağlı məsələlərin həlli qaydası haqqında” SSRİ qanununun pozulmasının daha çox müşahidə edilməsi ilə əlaqədardır. Beləliklə, o cümlədən Vilnüs, Klaypeda və İqnalina AES üçün qanuni olaraq Sovet İttifaqından ayrılmaqla bağlı xüsusi prosedur təyin edildi.

Eyni zamanda, parlamentari Litvadan sonra hadisələrin belə inkişafının Estoniya, Latviya və Ukrayna üçün də mümkün olduğu qənaətindədir.

Onun sözlərinə görə, Litvanın bu siyahıda birinci olması ilə bağlı bir sıra arqumentlər var. “Mexanizm işləndikdən sonra biz onu NATO-nun digər ərazilərində işləyəcəyik. Təkcə NATO-nun ərazilərində də deyil, məsələn, Ukrayna da qeyri-qanuni olaraq SSRİ-ni tərk edib”, - deyə Fyodorov bildirib.

Rusiyalı deputatın sözlərinə görə, bu cür aksiyaların keçirilməsində məqsəd həmin postsovet ölkələrindən gələn təhlükələri aradan qaldırmaqdır. Sülhpərvər siyasət yürüdən keçmiş Sovet İttifaqı respublikalarının müstəqilliyinin tanınmasına isə yenidən baxılmayacaq.

Xatırladaq ki, ötən çərşənbə Rusiya Dövlət Dumasının deputatı Yevgeni Fyodorov Rusiya parlamentinə SSRİ Dövlət Şurasının “Litva Respublikasının müstəqilliyinin tanınması haqqında” qərarının ləğvi barədə qanun layihəsi təqdim edib. Bu xəbər dərhal bütün xəbər agentliklərində və “Telegram” kanallarında yayıldı və geniş müzakirələrə səbəb oldu.