"Dünyada 400 milyona yaxın insanın həyatı Ukraynanın ərzaq məhsullarının ixracından asılıdır" - Zelenski

Rusiyanın Ukraynaya qarşı müstəmləkəçilik müharibəsi davam etdikcə dünyada ərzaq böhranı davam edəcək.

Redaktor.az UNİAN-a istinadla xəbər verir ki, bunu Ukrayna Prezidenti Volodimir Zelenski Afrika İttifaqı Assambleyasının Bürosunun iclasında çıxışı zamanı deyib.

Onun sözlərinə görə, indi Afrika faktiki olaraq Ukraynaya qarşı müharibəyə başlayanların girovluğundadır.

"Bu müharibə bəziləri üçün sizdən və sizin ölkələrinizdən çox uzaq görünə bilər. Amma fəlakətli şəkildə artan ərzaq qiymətləri artıq milyonlarla Afrika ailəsinin evinə təsir edib. Həmçinin Asiya, Avropa, Latın Amerikasında bir çox ailələrə. Bütün qitələrdə, Rusiya müharibəsi ilə təhrik edilən ərzaq qiymətlərinin ədalətsiz səviyyəsi ağrılı şəkildə hiss olunur. Ancaq təəssüf ki, bu, sizin ölkələr üçün xüsusi problemə çevrilə bilər”, - deyə Zelenski bildirib.

Prezident əlavə edib ki, müxtəlif amilləri nəzərə almaq lazımdır: Afrika qitəsində əhalinin sayının artması, pandemiyadan sonra iqtisadiyyatın bərpasının davam etməsi, xeyli baha qiymətə ərzaq almaq üçün bir çox ştatlarda daxili maliyyə ehtiyatlarının olmaması.

Dövlət başçısının sözlərinə görə, qlobal bazarda fiziki qıtlıq şəraitində Afrika qitəsinin bəzi ölkələri üçün zəruri ərzaq ehtiyatlarını saxlamaq xüsusilə çətindir.

"Böhran məhz fevralın 24-də Rusiya donanmasının Qara və Azov dənizlərindəki Ukrayna limanlarını bağladığı vaxt başladı. Dəniz yolu dövlətimizin kənd təsərrüfatı sektoru üçün əsas yoldur. Ukraynanın kənd təsərrüfatı məhsullarının ixracı isə sabitliyin əsaslarından biridir. Ukrayna buğda, günəbaxan yağı, qarğıdalı əsas tədarükçülərindən biridir”, - deyə Zelenski vurğulayıb.

O əlavə edib ki, ekspert hesablamalarına görə, dünyanın müxtəlif ölkələrində 400 milyona yaxın insanın həyatı Ukraynanın ərzaq məhsullarının ixracından asılıdır.

Prezident vurğulayıb ki, əgər Rusiyanın Ukraynaya qarşı müharibəsi olmasaydı, ərzaq bazarında qıtlıq yaranmazdı, ukraynalı fermerlər və kənd təsərrüfatı şirkətləri bu il rekord məhsul əldə edə bilərdi, Afrika, Asiyada və başqa yerlərdə ərzaq qiymətlərində fəlakətli artımlar yaşanmazdı.

"Bu vəziyyət dünyada hər şeyin nə qədər bağlı olduğunu nümayiş etdirir. Avropada bir müharibə, yəni Rusiyanın torpaqlarımızı ələ keçirmək, Ukraynanı öz müstəmləkəsinə çevirmək cəhdi hər yerdə ərzağa çıxışın pisləşməsinə səbəb olub, aclıq təhlükəsi artır. Təbii ki, biz müdafiədəyik, əlbəttə ki, bu müharibədə qalib gələnə qədər müstəqilliyimizi qoruyacağıq. Və təbii ki, biz artıq yeni təchizat logistikası qurmağa çalışırıq”, - deyə prezident bildirib.

Onun sözlərinə görə, hazırda Ukraynanın elevatorlarında Ukrayna məhsullarının ənənəvi istehlakçılarının gözlədiyi 25 milyon tondan çox taxıl var.

İndi dəmir yolu və qonşu ölkələrin limanları vasitəsilə ixrac qurulur ki, hətta keçənilki məhsul və builki məhsul istehlakçılara çatsın.

"Lakin yeni marşrutlar daha kiçik həcmdə və daha uzun müddətə göndərməyi bacarır. Bu, son nəticədə təchizatın qiymətinin artmasına gətirib çıxarır", - Zelenski bildirib.

Dövlət başçısı əlavə edib ki, Ukrayna limanlarının blokdan çıxarılması üçün mürəkkəb çoxsəviyyəli danışıqlar davam edir, lakin hələlik heç bir irəliləyiş yoxdur, çünki Rusiyanın bir daha onlara hücum etməməsi üçün real vasitə hələ tapılmayıb.

“Ona görə də bu müstəmləkəçilik müharibəsi davam etdikcə, Rusiyanın dövlətimizə qarşı müharibəsi davam etdikcə və limanlarımız bağlandıqca dünyada ərzaq böhranı davam edəcək”, - deyə prezident bildirib.

Zelenski xatırladıb ki, Ukrayna Avropanın əsas gübrə istehsalçılarından biri olub, lakin xammal çatışmazlığı və raket zərbələri və ya məhv olmaq təhlükəsi səbəbindən istehsalın faktiki olaraq dayandırılıb.

"Və bəzi müəssisələr artıq müharibə zonalarındadır və sadəcə olaraq rus qoşunları tərəfindən işğal edilib. Bu barədə əlaqə saxladığınız rusiyalı tərəfdaşlarınızdan eşitmisinizmi? Onlar sizə bu barədə dəqiq məlumat veriblər? Əminəm ki, sizə  tamam başqa şeylər deyirlər. Amma əslində bu böhran onlara lazımdır. Bunu bilərəkdən daha da gərginləşdirirlər. Çünki onlar Rusiyaya qarşı sanksiyalar tətbiq edən demokratik dövlətlərə təzyiq göstərmək üçün sizdən və insanların əziyyətindən istifadə etməyə çalışırlar”, - deyə dövlət başçısı vurğulayıb.

Zelenski bildirib ki, sanksiya siyasəti yalnız Rusiyanın Ukraynanı öz köləsinə çevirmək cəhdini dayandırmasını təmin etmək məqsədi daşıyır.

Qeyd edək ki, 2022-ci il mayın 30-da Ukrayna Prezidenti Aparatının rəhbəri Andrey Yermak bildirib ki, Rusiyanın təhrik etdiyi qlobal ərzaq böhranından hələ də qaçmaq olar. Onun sözlərinə görə, taxıl yüklərini müşayiət edəcək tərəfdaş ölkələrin hərbi karvanlarını Qara dənizə göndərməklə Ukrayna limanlarını blokdan çıxarmaq lazımdır.

İyunun 7-nə olan məlumata görə, Rusiya fevral ayında Rusiya işğalından sonra 500 min tona qədər Ukrayna buğdasını 100 milyon dollar dəyərində oğurlayıb. Bu yüklərin böyük hissəsi yük maşınları ilə işğal olunmuş Krımdakı limanlara çatdırılıb.

Turan ASLAN