ABŞ-ın müdafiə naziri Ukrayna ordusunun Xersonu tamamilə azad edəcəyinə əmindir

 23:34 03.11.2022     240

ABŞ-ın müdafiə naziri Lloyd Ostin Ukrayna qoşunlarının Xerson vilayətinin Rusiya tərəfindən işğal olunmuş sağ sahilini, o cümlədən regional mərkəzini geri ala biləcəyinə əminliyini ifadə edib.

"Ukraynalıların Dnepr çayının sağ sahilində yerləşən Xerson vilayətinin qalan ərazisini ələ keçirə biləcəkləri sualına gəlincə, şübhəsiz ki, onlar buna qadirdirlər. Və ən əsası, ukraynalılar inanırlar ki, onlar buna qadirdirlər”, - deyə Pentaqonun rəhbəri bildirib.

Redaktor.az “European Truth”a istinadla xəbər verir ki, Pentaqon rəhbəri Ukrayna Silahlı Qüvvələrinin əks-hücumunun qışda davam edib-etməyəcəyini proqnozlaşdırıb.

"Biz bilirik ki, onlar öz suveren ərazilərini geri almaq üçün metodik və yüksək effektiv səylərə əl atıblar. Düşünürəm ki, onlar çayın sağ sahilindəki əraziyə nəzarət edənə qədər təzyiqləri davam etdirəcəklər", - o əlavə edib.

Qeyd edək ki, oktyabrın 27-də Ukrayna Milli Müqavimət Mərkəzi rusların Xerson vilayətindəki işğal administrasiyasını Dnepr çayının sol sahilinə köçürdükləri, yəni Xersondan çıxarıldıqları barədə məlumat yayıb. Onları buna Ukrayna Silahlı Qüvvələrinin əks hücumu və körpülərin dağıdılması vadar edib.

O da məlum olub ki, Xersonda vilayət dövlət administrasiyasının binasından Rusiya Federasiyasının bayrağı yoxa çıxıb.

İşğalçıların hərəkətlərini təsvir edən Britaniya kəşfiyyatı qeyd edib ki, əhalinin getməsi və Potemkinin qalıqlarının Xersondan çıxarılması Rusiyanın bu ərazidən çıxışını sürətləndirmək niyyətindən əvvəldir.

Turan ASLAN