"İsveç özünü bu vəziyyətə gətirib" - Ömər Çelik
İsveç və Finlandiyanın NATO-ya qəbulu prosesində geriləmə müşahidə olunur, buna görə Stokholm günahkardır.
Redaktor.az xəbər verir ki, bunu Türkiyə Prezidenti Rəcəb Tayyib Ərdoğanın sədrlik etdiyi Ədalət və İnkişaf Partiyasının (AKP) sözçüsü Ömər Çelik deyib.
"Biz üçtərəfli mexanizmin buna gəlməsini istəmirdik, onlar buna gətirib çıxardı. Danışıqlar masasında irəliləyiş yox, reqressiya var. İsveç özünü bu vəziyyətə gətirib, verdiyi vədlərin heç birini yerinə yetirə bilməyib. Bu kontekstdə üçtərəfli görüşün keçirilməsinin heç bir mənası yoxdur”, - deyə o, CNN Türk-ə müsahibəsində bildirib.
Çelik əlavə edib ki, Finlandiya NATO ilə İsveçdən ayrı alyansa üzvlük məsələsini müzakirə etməyə davam edəcək. "Finlandiya bu prosesdə özünü müsbət tərəfdən fərqləndirmək istəyir. Ona görə də NATO ilə danışacaq. Finlandiya və İsveç iki fərqli ölkədir. Finlandiya terrorla mübarizədə düzgün addımlar atdıqdan sonra, şübhəsiz ki, İsveçdən fərqli olacaq".
Qeyd edək ki, ötən gün İsveç və Finlandiyanın NATO-ya qəbulu ilə bağlı Ankara, Stokholm və Helsinki arasında fevral ayına planlaşdırılan danışıqlar qeyri-müəyyən müddətə təxirə salınıb.
Şənbə günü sağçı ekstremist “Sərt kurs” partiyasının lideri Rasmus Paludan Türkiyənin Stokholmdakı səfirliyi qarşısında Qurani Kərimin açıq yandırılması ilə aksiya keçirib. O, çıxışında Türkiyə Prezidenti Tayyib Ərdoğanı tənqid edib və Məhəmməd peyğəmbərin karikaturasını nümayiş etdirib. Bazar ertəsi Ərdoğan deyib ki, İsveç Stokholmdakı anti-Türkiyə etirazlarından sonra Ankaranın NATO-ya üzvlük cəhdini dəstəkləyəcəyini gözləməməlidir. Türkiyənin xarici işlər və müdafiə nazirləri Mövlud Çavuşoğlu və Hulusi Akar daha əvvəl də oxşar ruhda danışmışdılar.
İsveç və Finlandiya 2022-ci ilin mayında Şimali Atlantika Alyansına üzvlük üçün müraciət etmişdi, lakin Türkiyə kürd təşkilatlarını terrorçu elan etmələrini və 2016-cı ildə terrorizmdə və ya dövlət çevrilişinə cəhddə iştirakda ittiham olunan şəxslərin ekstradisiyasını tələb edərək NATO-ya üzvlük prosesini əngəllədi. İyunun 28-də Madriddə NATO sammiti başlamazdan əvvəl Ərdoğan, Finlandiya prezidenti Sauli Niinistö, İsveçin o zamankı baş naziri Maqdalena Andersson və Alyansın baş katibi Yens Stoltenberq arasında Stokholm və Helsinkinin NATO-ya üzv olmasına icazə verən memorandum imzalanıb.
Ankara daha əvvəl bəyan etmişdi ki, bu memorandum yekun deyil və iki ölkə terror təşkilatlarına qarşı mübarizə üzrə orada nəzərdə tutulan öhdəlikləri yerinə yetirməsə, Türkiyə parlamenti onu təsdiq etməyə bilər.
Turan ASLAN
Bizi Telegram-da izləyin...
