Fransa Ukraynaya daha 12 "Sezar" göndərir
Fransa Kiyevə əlavə 12 "Sezar" özüyeriyən artilleriya qurğusunu göndərmək, həmçinin bu yayın əvvəlinə qədər 2000-ə qədər ukraynalı hərbçiyə təlim keçmək niyyətindədir.
Redaktor.az TASS-a istinadla xəbər verir ki, bu barədə Fransanın silahlı qüvvələr naziri Sebastyan Lekornu Ukraynanın müdafiə naziri Aleksey Reznikovla birgə mətbuat konfransında bildirib.
“Nazir Reznikovla söhbətimizdən və Fransa prezidenti Emmanuel Makronla söhbətimizdən sonra deyə bilərəm ki, biz Ukraynaya əlavə 12 "Sezar" özüyeriyən silahı çatdıra biləcəyik”.
Nazir artilleriya qurğularının çatdırılma müddətini dəqiqləşdirməyib, sadəcə qeyd edib ki, onların dəyəri Fransa tərəfindən təşkil edilən 200 milyon avro məbləğində Kiyevə hərbi yardım fondu tərəfindən ödəniləcək. O, həmçinin Ukraynadan hərbi kadrların hazırlanması üçün Polşaya 150 fransız əsgərinin göndəriləcəyini bildirib. Onların ayda 600-ə qədər Ukrayna əsgərinə təlim keçə biləcəkləri gözlənilir.
Xatırladaq ki, bu günə qədər Fransa Ukraynaya 18 “Sezar” özüyeriyən artilleriya sistemi və 2 “Crotale” zenit kompleksi akkumulyatoru göndərib. Dekabrda Makron bildirmişdi ki, respublika Kiyevi 2023-cü ilin əvvəlində yeni silah və sursat partiyası ilə təmin etməyi planlaşdırır. Bundan əlavə, yanvarın 30-da Danimarkanın baş naziri Mette Frederiksen 19 "Sezar" özüyeriyən artilleriya qurğusunun Ukraynaya təhvil verilməsini təsdiqləyib.
Turan İSMAYIL
Bizi Telegram-da izləyin...
