Orban Zelenskinin silah tələbinə "yox" dedi
Brüsseldə Avropa İttifaqı (Aİ) liderlərinin sammitində Ukrayna Prezidenti Volodimir Zelenski Macarıstanın Baş naziri Viktor Orbanla dialoq zamanı onu Ukraynaya səfərə dəvət edib.
Redaktor.az xəbər verir ki, bu barədə Macarıstanın “Nepszava” nəşri siyasətçilər arasında dialoqun məzmunu ilə tanış olan mənbələrə istinadən məlumat yayıb. Mənbələr bildirib ki, sammitdə dövlət və hökumət başçıları Ukrayna prezidenti ilə bir neçə danışıqlar qrupuna bölünüb. Orban Zelenski ilə Sloveniya, Bolqarıstan, Kipr, Yunanıstan, Xorvatiya və Avstriya liderləri ilə görüşüb.
Orban sosial şəbəkəsində Zelenski ilə əl sıxma anının fotosunu yayıb.
Nəşrin mənbələrə istinadən verdiyi məlumata görə, dialoq zamanı Ukrayna prezidenti Orbanı Kiyevə səfərə dəvət edib, lakin macar siyasətçinin dəvəti qəbul edib-etmədiyi məlum deyil.
Nəşrin mənbələrinə görə, səkkiz liderin yarım saatlıq görüşündə əsas müzakirə mövzusu silah təchizatı olub. Zelenski Ukrayna Silahlı Qüvvələrinə lazım olan silahların siyahısı ilə başlayıb. Eyni zamanda, Macarıstanın baş naziri və Avstriya kansleri Zelenskinin tələbini yerinə yetirə bilməyəcəklərini dərhal bəyan etdilər.
Qeyd edək ki, Viktor Orbanın başçılıq etdiyi Macarıstan hökuməti daim Ukrayna ilə bağlı qalmaqallı bəyanatlar verir. Müharibə başlayandan bəri Orban özü də anti-Ukrayna mövqeyini kifayət qədər aydın şəkildə ifadə edib.
Bundan başqa, Budapeşt dəfələrlə Kremlə qarşı Avropa sanksiyalarının tətbiqinin qarşısını alıb. Nəticədə Budapeştin Aİ-dən maliyyələşmə ilə bağlı problemləri var. 30 noyabr 2022-ci ildə məlum olub ki, Orban hökuməti məhkəmə və antikorrupsiya islahatları həyata keçirməyənə qədər Macarıstan 7,2 milyard avro almayacaq.
Həmçinin Macarıstan Ukraynaya silah yardımından imtina edib və Ukrayna Silahlı Qüvvələri üçün silahların öz ərazisindən daşınmasını qadağan edib.
Turan İSMAYIL
Bizi Telegram-da izləyin...
