"Barəmdə olan bütün cinayət işləri ağ sapla tikilib" - Həbsdən çıxan eks-prezident
Qırğızıstanın eks-prezidenti Almazbek Atambayev bu gün cəza çəkdiyi həbsxananı tərk edib.
Redaktor.az xəbər verir ki, bu barədə TASS-ın müxbiri hadisə yerindən məlumat verib.
Qırğızıstan dövlətinin keçmiş rəhbəri vəkilləri və ailə üzvlərinin müşayiəti ilə koloniyanı tərk edib. Atambayevin sözlərinə görə, onun azadlığa buraxılması ilə bağlı qərar bazar ertəsi məhkəmə tərəfindən verilib, lakin bütün hüquqi məsələlər yalnız fevralın 14-də tamamlanıb.
Həbsxanadan çıxandan sonra Atambayev İspaniyada müayinə və müalicə almaq niyyətində olduğunu açıqlayıb. O, TASS müxbirinin sualını cavablandırarkən deyib: “Mən müalicə üçün İspaniyaya getmək niyyətindəyəm".
Onun sözlərinə görə, onun azad edilməsi üçün İspaniya hökumətinin və Sosialist İnternasionalının nümayəndələri çox iş görüblər. "Nə qədər tez olsa, bir o qədər yaxşıdır", - Atambayev İspaniyaya səfərin mümkün vaxtını şərh edərkən deyib.
Eks-prezident əlavə edib ki, müalicə olunduqdan sonra Qırğızıstana qayıtmağı planlaşdırır. “Mən mütləq qayıdacağam”, - Atambayev deyib. Onun sözlərinə görə, barəsində olan bütün cinayət işləri “ağ sapla tikilib”. "Əsas odur ki, indi sağalmalıyam, 3,5 il həbs zarafat deyil. Ondan sonra nə edəcəyimi düşünməyə başlayacağam", - keçmiş dövlət başçısı bildirib.
Qeyd edək ki, 2011-2017-ci illərdə Qırğızıstana rəhbərlik etmiş Atambayev 2019-cu il avqustun 8-də Çuy vilayətinin Koy-Taş kəndindəki iqamətgahda, demək olar ki, bir gün davam edən xüsusi əməliyyat zamanı saxlanılıb. Ona qarşı bütün ittihamları dəfələrlə rədd edən keçmiş dövlət başçısının tərəfdarları müqavimət göstərib və əməliyyat zamanı xüsusi təyinatlıların bir zabiti həlak olub. Qarşıdurma zamanı polis əməkdaşları da daxil olmaqla 100-dən çox insan tibbi yardım üçün müraciət edib.
Həbsdən bir neçə gün sonra sabiq prezidentə qarşı hüquq-mühafizə orqanlarının əməkdaşlarına qarşı zorakılıq tətbiq etmək, kütləvi iğtişaşlar təşkil etmək, qətl törətmək, adam öldürməyə cəhd təşkil etmək, o cümlədən girov götürmənin təşkilində, kriminal avtoritet Əziz Batukaevin həbsxanadan qanunsuz azad edilməsində, Bişkek İES-in yenidən qurulması zamanı korrupsiya, Bişkekdə "Forum" sənaye qrupunun binası ilə qanunsuz sövdələşmə və Koi-Taş kəndində və İssık-Kul bölgəsində qanunsuz torpaq sahələri əldə etməkdə ittiham olunub.
2020-ci ilin yayında keçmiş dövlət başçısı 2013-cü ildə Batukaevin qanunsuz olaraq azadlığa buraxılması işi üzrə 11 il 2 ay müddətinə azadlıqdan məhrum edilib.
Atambayevə qarşı irəli sürülən ittihamların bəziləri sonradan götürülüb; 2022-ci ilin iyununda o, 2020-ci ilin oktyabrında Bişkekdə kütləvi iğtişaşların təşkili ilə bağlı iş üzrə bəraət qazanıb.
Turan İSMAYIL
Bizi Telegram-da izləyin...
