Çavuşoğlu finlandiyalı həmkarı ilə NATO-nun genişlənməsini müzakirə etdi
Türkiyənin xarici işlər naziri Mövlud Çavuşoğlu finlandiyalı həmkarı Pekka Haavisto ilə NATO-nun genişlənməsini müzakirə edib.
Redaktor.az yerli mediaya istinadla xəbər verir ki, nazir bu barədə Tviter hesabında yazıb.
“Finlandiya Prezidentinin səfərindən əvvəl biz Finlandiyanın xarici işlər naziri ilə görüşdük. Biz NATO-nun genişlənməsi məsələlərini müzakirə etdik və zəlzələnin nəticələrinin aradan qaldırılmasında göstərdikləri dəstəyə görə onlara təşəkkür etdik”, - Çavuşoğlu bildirib.
Qeyd edək ki, Finlandiya prezidenti Sauli Niinistö Türkiyədə səfərdədir. Finlandiya prezidentinin ofisindən verilən məlumata görə, Finlandiya liderinin səfəri cümə axşamı Türkiyənin cənub-şərqindəki zəlzələ bölgəsinə səfərlə başlayıb. Finlandiya mətbuatı ilkin olaraq Finlandiya və Türkiyə prezidentləri arasında danışıqların İstanbulda keçiriləcəyi bildirilsə də, sonradan danışıqlar Ankaraya köçürülüb.
Turan İSMAYIL
Bizi Telegram-da izləyin...
