İranda etirazçılar “Bəsic”in bazasını yandırdı
İranın müxtəlif əyalətlərində, o cümlədən Tehran, Kirman, Gilan, Mazandaran, İlam və bir sıra əyalətlərində etiraz aksiyaları davam edib.
Redaktor.az xəbər verir ki, azərbaycanlılar yaşayan bölgələrdə fəallar tərəfindən Azərbaycan bayrağı müxtəlif yerlərdən asılmağa davam edib.
“Diktatora ölüm!”, “Xameneiyə ölüm!”, “Uşaq öldürən hökumətə ölüm!”, “Qız öldürən hökumətə ölüm!” və bu kimi şüarlar səsləndirilib.
Küçələrdə hicabsız qadınlar və kişilər birlikdə rəqs ediblər.
Məşhəd, Tehran şəhərlərində divarlara İİR əleyhinə şüarlar yazılıb.
Sosial şəbəkələrdə yayılan videolardan görünür ki, qadınlar məcburi hicaba riayət etmirlər.
Sosial şəbəkələrdə yayılan digər videoda Semnan şəhərində hicab qaydalarına əməl etməyən qızın polislər tərəfindən kobud şəkildə həbs olunması əks olunub.
Tehran əyalətində, Tehran şəhərinin Baqeri, Ekbatan, Səttarxan bölgələrində etiraz aksiyası keçirilib və “Diktatora ölüm!”, “Xameneiyə ölüm!”, “Uşaq öldürən hökumətə ölüm!” şüarları səsləndirilib.
Gilan əyalətində bir gənc su idarələrinin yanlış idarəçiliyinə və ölkənin şimalında İslam Respublikasının hakimiyyəti altında su ehtiyatlarının məhv edilməsi təhlükəsinə etiraz edib.
Kirman şəhərində Qasim Süleymaninin baneri etirazçılar tərəfindən yandırılıb. Onlar “İstər edam olsun, istər həbsxana, biz sona qədər dayanacağıq!” şüarı səsləndiriblər.
Mazandaran əyalətinin Sari şəhərində “Bəsic” qüvvələrinə məxsus baza etirazçılar tərəfindən yandırılıb.
İlam əyalətinin Dehluran şəhərində insanlar inqilab zamanı həbs edilmiş 5 kürd vətəndaşın azad edilməsi tələbi ilə etiraz aksiyası təşkil ediblər.
Tehranda “Məkkə şəhidləri”, “Pərdis Şərif”, “Əbrar”, Kirmanşahda “Peyğəmbər”, Kərəcdə “Təhzib”, İslamşəhr şəhərində “Saipa” məktəblərinə kimyəvi hücum olub.
İran İslam İnqilabı Keşikçiləri Korpusuna bağlı Fars Xəbər Agentliyi tələbələri ittiham edərək iddia edib ki, “müvafiq qurumlar tərəfindən aparılan geniş araşdırmalar” məktəblərdə kimyəvi hücumların 90 faizindən çoxunun “tələbələr tərəfindən törədildiyini” göstərir.
İranda Novruz bayramından sonra kirayə qiymətlərində artım müşahidə olunub.
İran İnsan Haqları Təşkilatının hesabatına görə, 2022-ci ildə 121-i (47,3 faiz) etnik azlıqlar, xüsusilə də bəluc nümayəndələri olmaqla ən azı 256 nəfər narkotiklə əlaqəli cinayətlərə görə edam edilib.
Sosial şəbəkələrdə yayılan məlumata görə, Abadə Sement Zavodunun işçiləri 8 aydır əməkhaqlarını ala bilmirlər və onların sığorta haqqı ödənilmədiyinə görə sosial sığorta kitabçaları etibarsız hesab edilib. 2022-ci ildə bu zavodun rəhbərliyi qanuni borclarının ödənilməməsinə etiraz edən 8 işçini işdən azad edib (apa).
Bizi Telegram-da izləyin...
