Ermənistan hökuməti Türkiyə ilə sərhəddə keçid məntəqəsi üçün vəsait ayırdı
Ermənistan hökuməti Türkiyə ilə sərhəddə yerləşən Marqara gömrük-keçid məntəqəsinin layihəsinə 28,3 milyon dram (təxminən 72 min dollar) ayırıb.
Redaktor.az "Sputnik Armenia"ya istinadla xəbər verir ki, bu barədə qərar hökumətin iclasında qəbul edilib.
Bundan əvvəl martın 28-də qərarla gələcək gömrük üçün ərazi Dövlət Gəlirləri Komitəsinə verilib.
Hökumət qərarında qeyd olunur ki, tikinti qısa müddətdə başa çatdırılmalı, ona görə də layihələndirmə və tikinti paralel aparılmalıdır. Birinci mərhələdə kommunikasiyalar və bünövrə layihələndiriləcək, ikinci mərhələdə isə faktiki tikinti işləri aparılacaq.
Hökumət keçid məntəqəsini tez bir zamanda təhvil vermək istədiyi üçün tikinti tendersiz aparılacaq. Bunun üçün Dövlət Gəlirləri Komitəsi Şəhərsalma Komitəsinə müraciət edərək ən qısa müddətdə layihələndirmə və tikinti işlərini hansı şirkətlərin həyata keçirə biləcəyini bildirmək istəyib. Bir neçə şirkət belə bir müddət ərzində işləri yerinə yetirməkdən imtina etdikdən sonra Komitə dizayner kimi Arbak və Sons, tikinti şirkətləri kimi isə Artcon və Saakyanshin-i təklif edib.
Bundan əvvəl Ermənistanın xarici işlər naziri Ararat Mirzoyan bildirib ki, Türkiyə Xarici İşlər Nazirliyi ilə əldə olunan razılaşmalara əsasən, Ermənistan-Türkiyə sərhədinin üçüncü ölkə vətəndaşları, eləcə də diplomatik pasport sahibləri üçün yay aylarında açılması planlaşdırılır.
Turan İSMAYIL
Bizi Telegram-da izləyin...
