Ukraynadan taxıl müqaviləsi ilə bağlı açıqlama
Taxıl sazişinin bağlanması ilə bağlı məsləhətləşmələr onlayn davam edəcək.
Redaktor.az xəbər verir ki, bunu Ukraynanın baş nazirinin müavini - icmaların, ərazilərin və infrastrukturun inkişafı üzrə naziri Aleksandr Kubrakov bildirib.
"İstanbulda taxıl təşəbbüsünün fəaliyyət göstərməsi ilə bağlı danışıqlar başa çatıb. BMT və Türkiyə başa düşürlər ki, taxıl təşəbbüsü dünyanın ərzaq təhlükəsizliyi üçün mühümdür və stabil fəaliyyət göstərməlidir. Buna görə də onların təklifi ilə blokun açılması ilə bağlı növbəti məsləhətləşmələr aparılacaq. Təşəbbüs onlayn formatda davam edəcək”, -deyə o, feysbukda yazıb.
Kubrakov əlavə edib ki, Ukrayna nümayəndə heyəti taxılçılıq təşəbbüsünün daha uzun müddətə uzadılmalı və genişləndirilməli olduğunu bir daha vurğulayıb. Onun sözlərinə görə, ilk növbədə, daxil olan donanmanın qeydiyyatını bərpa etmək və süni ləngimələrə yol vermədən yoxlamalar aparmaq lazımdır.
Qeyd edək ki, Rusiya xarici işlər nazirinin müavini Sergey Verşin bu gün İstanbulda Rusiya, Ukrayna, Türkiyə və BMT arasında taxıl sazişi üzrə danışıqların yekunlarına əsasən deyib ki, Rusiya Qərbin müdafiə etdiyi taxıl sazişinin sonsuz uzadılmasına və ya genişləndirilməsinə qarşıdır.
22 iyul 2022-ci ildə İstanbulda qida və gübrələrin beynəlxalq bazara tədarükü ilə bağlı sənədlər paketi imzalanıb. İlkin olaraq müqavilələr 120 gün müddətinə bağlanıb, 2022-ci ilin noyabrında eyni müddətə uzadılıb. 2023-cü il martın 18-də Rusiya sazişin müddətini 60 gün uzadacağını elan edərək, bunun BMT ilə imzalanmış memorandumun icrasını qiymətləndirmək üçün kifayət qədər vaxt olacağı barədə xəbərdarlıq edib.
Turan İSMAYIL
Bizi Telegram-da izləyin...
