Rusiya Uşaqlar Günündə ukraynalı uşaqları belə “təbrik etdi"
Ötən gecə rus işğalçıları Ukraynanın paytaxtı Kiyevə bir neçə zərbə vurub, xüsusən də uşaq klinikasına hücum ediblər. Düşmən zərbəsi ən azı üç nəfərin həyatına son qoydu və ondan çox adamı şikəst etdi (ölənlər və yaralananlar arasında uşaqlar da var).
Redaktor.az UNİAN-a istinadla xəbər verir ki, Ukrayna Silahlı Qüvvələrinin Baş Qərargahı paytaxt bölgəsinə hücumların “İsgəndər” tipli raketlərdən istifadə edilərək həyata keçirildiyini bildirib.
"Bu gecə düşmən yenidən Kiyev vilayətində mülki və mühüm infrastruktur obyektlərinə qarşı "İsgəndər” operativ-taktiki raket kompleksinin raketlərindən istifadə edib. Əvvəllər 10 raketdən 10-u Ukrayna Silahlı Qüvvələrin Hərbi Hava Qüvvələrinin qüvvə və vasitələri tərəfindən məhv edilib”, - Baş Qərargah səhər hesabatında bildirib.
Bundan əlavə, Rusiya son sutka ərzində Ukrayna qoşunlarının mövqelərinə və yaşayış məntəqələrinə 3 raket və 29 hava zərbəsi endirib, çoxsaylı reaktiv yaylım atəşi sistemlərindən 49 hücum həyata keçirib.
"Təəssüf ki, mülki əhali arasında itkilər var, fərdi yaşayış binaları və digər infrastruktur zədələnib. Ukraynanın hər yerində raket və hava zərbələrinin endirilməsi ehtimalı gələcəkdə də çox yüksək olaraq qalır", - Baş Qərargah qeyd edib.
Qeyd edilib ki, rus işğalçıları qanadlı və yaxud ballistik raketlərlə Kiyevə və bölgəyə hücumlar ediblər.
Raket parçalarının düşməsi nəticəsində şəhərin bir sıra rayonlarında dağıntılar qeydə alınıb, dinc əhali arasında tələfat var.
Səhər saat 07:15-ə olan məlumata görə, 3 nəfər ölüb (onlardan biri 10-11 yaşlı uşaqdır), 10 nəfərin yaralanması (onlardan biri uşaq) məlumdur.
Qeyd edək ki, bu gün Uşaqların Beynəlxalq Müdafiəsi Günüdür.
Turan İSMAYIL
Bizi Telegram-da izləyin...
