Ərdoğan Yunanıstanı HƏDƏLƏDİ
"Egey dənizindəki münaqişənin sülh yolu ilə həllinə Yunanıstanın maneçiliyi davam edərsə, Türkiyə fərqli davrana bilər".
Redaktor.az TASS-a istinadla xəbər verir ki, bu barədə bazar ertəsi Türkiyə Prezidenti Rəcəb Tayyib Ərdoğan yenidən seçildikdən sonra Şimali Kiprə ilk xarici səfəri zamanı keçirdiyi mətbuat konfransında deyib.
"Bizim yol xəritəmiz məlumdur. Bu, sülh yolu yoludur. Bu dənizlərdə sülhdən başqa yol yoxdur. Amma sülhə müdaxilə etmək istəyənlər varsa, o zaman başqa variantları həyata keçirməli olacağıq",- deyə Ərdoğan bildirib.
Türkiyə lideri həmçinin əlavə edib ki, mövcud balanslara zidd olaraq regionun və Kipr adasının yunan tərəfinin əsassız silahlanması ilə məşğul olmağa çalışanlar bu cür hərəkətlərin risklərini diqqətlə hesablamalıdırlar.
Türkiyə ilə Yunanıstan arasında Egeydə sərhədlərlə bağlı münaqişə uzun müddətdir ki, davam edir.
Yunanıstanın ərazi suları Egeydəki 2000-dən çox adasının ətrafında 6 dəniz milinə qədər uzanır, lakin Afina onu beynəlxalq dəniz hüququ ilə tanınan standart olan 12 dəniz milinə qədər uzatmaq hüququna malik olduğunu deyir. Öz növbəsində Ankara dəfələrlə Afinaya Yunanıstan tərəfindən öz ərazi sularının bu cür genişləndirilməsinin “müharibə elan etmək üçün formal səbəb” olacağını qeyd edib. Bundan əlavə, Türkiyə bəzi silahların Yunan adalarına yerləşdirilməsindən narahatdır.
Tunar Altunbay
Bizi Telegram-da izləyin...
