"Vaqner" rəhbərinin üsyana çağırışı Rusiyanı QARIŞDIRDI

Ukraynanın işğalında iştirak edən Rusiyanın “Vaqner” Xüsusi Hərbi Şirkətinin başçısı, Prezident Vladimir Putinin keçmiş aşpazı Yevgeni Priqojin Rusiya Müdafiə Nazirliyini döyüşçülərinin arxa bazalarına zərbələr endirməkdə ittiham etdikdən sonra rusları ona qoşulmağa çağırıb.

Redaktor.az UNİAN-a istinadla xəbər verir ki, "Vaqner" rəhbəri Rusiya hərbi rəhbərliyindən qisas alacağını bəyan edib:

"Bizim 25 min nəfərik və ölkədə xaosun niyə baş verdiyini anlayacağıq. 25 min nəfər taktiki ehtiyat kimi gözləyir, bütün ordu və bütün ölkə strateji ehtiyatdır. Hər kəsi bizə qoşulmağa çağırıram. Biz bu qarışıqlığa son verməliyik” - deyə "Vaqner" rəhbərinin mətbuat xidməti tərəfindən yayımlanan audio mesajda deyilir.

Priqojin Rusiyanın müdafiə naziri Sergey Şoyqunu Rostodan qaçmaqda ittiham edib.

"Şoyqu sadəcə qorxaqcasına Rostovdan qaçdı. Saat 21:00-da o, qadın kimi qorxaqcasına qaçdı. Bizim oğlanları məhv etmək üçün vertolyotları niyə qaldırdığını, niyə raket zərbələri endirdiyini izah etməmək üçün. Bu məxluqun qarşısı alınacaq", - deyə "Vaqner" rəhbəri bildirib. 

Yevgeni Priqojin iddia edir ki, Rusiya Federasiyasının hərbi komandanlığı guya "Vaqner"in arxasına hücum edən topçulardan qaranlıqda istifadə edib.

"Təfərrüatlar görünməyə başladı, Şoyqu "Vaqner"i məhv etmək üçün əməliyyat aparmaq üçün xüsusi olaraq Rostova gəlmişdi, o, bizi məhv etmək üçün qaranlıqda topçulardan və helikopter pilotlarından istifadə etdi" - o, deyib.

Yerli “Rostovgazeta” nəşrinin məlumatına görə, Şoyqunun səfəri barədə yalnız “NewsFrol” və “Moskva Laundry Telegram” kanalı məlumat verib, lakin Müdafiə Nazirliyi və ya Rusiya dövlət xəbər agentlikləri məlumat verməyib.

Yevgeni Priqojin bildirib ki, "Vaqner"in hərəkətləri “hərbi çevriliş deyil” və “heç bir şəkildə qoşunlara müdaxilə etmir”.

Xatırladaq ki, bundan əvvəl “Vaqner” rəhbəri Yevgeni Priqojin Müdafiə Nazirliyi tərəfindən onun bazasına zərbə endirilməsi barədə məlumat vermiş və qisas alacağına söz vermişdi.

Rusiya Müdafiə Nazirliyi isə bildirib ki, sosial şəbəkələrdə "Vaqner" rəhbəri evgeni Priqojinin adından “Rusiya Müdafiə Nazirliyinin "Vaqner"in arxa düşərgələrinə zərbə endirməsi” ilə bağlı yayılan bütün məlumatlar və videogörüntülər reallığa uyğun gəlmir və informasiya təxribat xarakteri daşıyır.

Rusiyanın TASS xəbər agentliyi xəbər verir ki, Rusiya Federal Təhlükəsizlik Xidməti (FTX) "Vaqner"in rəhbəri Priqojinə qarşı silahlı üsyana çağırışa görə cinayət işi açıb.

FTX bəyan edib ki, Yevgeni Priqojinin adından yayılan iddiaların heç bir əsası yoxdur:

"Bu bəyanatlarla əlaqədar Rusiya FTX-si silahlı üsyana çağırış faktı ilə bağlı cinayət işi açıb. Biz qanunsuz hərəkətlərə dərhal son qoyulmasını tələb edirik".

FTX Yevgeni Priqojinin bəyanatları və hərəkətlərini “Rusiya Federasiyasının ərazisində silahlı vətəndaş münaqişəsinin başlanmasına çağırışlar” adlandırıb.

FTX-nin İctimaiyyətlə Əlaqələr Mərkəzi həmçinin "Vaqner" muzdlularını Priqojinin “cinayətkar əmrlərini” yerinə yetirməməyə və “onun saxlanılması üçün tədbirlər görməyə” çağırıb.

Onlar iddia edirlər ki, Priqojinin bəyanatları və hərəkətləri əslində Rusiya Federasiyası ərazisində silahlı vətəndaş münaqişəsinin başlanmasına çağırışdır.

"Sosial şəbəkələrdə Priqojinin adından Müdafiə Nazirliyinin "Vaqner"ə iddia edilən zərbələri ilə bağlı yayılan məlumatlar həqiqətə uyğun deyil və təxribatdır. Priqojinin üsyana çağırış faktı ilə bağlı iş vəziyyətin ciddiliyinə görə başlanıb. Rusiya silahlı qüvvələri "xüsusi əməliyyat zonası"nda Ukrayna Silahlı Qüvvələri ilə təmas xəttində döyüş tapşırıqlarını yerinə yetirməkdə davam edir”, - FTX bildirib.

Rusiya Federasiyasının Baş Prokurorluğu da Yevgeni Priqojinə qarşı silahlı üsyan təşkil etmə faktı ilə bağlı cinayət işinin başlandığını elan edib.

"Onun əməllərinə lazımi hüquqi qiymət veriləcək. Bu cinayət 12 ildən 20 ilədək müddətə azadlıqdan məhrum etmə ilə cəzalandırılır", - prokurorluğun məlumatında deyilir.

Putinin mətbuat katibi Dmitri Peskov isə bildirib ki, Rusiya Federasiyası prezidenti “Priqojin ətrafında cərəyan edən vəziyyətdən xəbərdardır və bütün lazımi tədbirlər görülür”.

Kremlə yaxın mənbə isə deyib ki, "Prezident Administrasiyasında çaxnaşma var, onlar vətəndaş müharibəsinin başlaması ssenarisini istisna etmirlər".

Mənbənin sözlərinə görə, bir həftə əvvəl Priqojinin nəsə hazırladığı barədə məlumat var idi. Mənbə hesab edir ki, "Vagner"in yerləşdiyi yerə raket hücumunun ehtimal olunan nəticələrini əks etdirən video səhnədir.

Son məlumatlara görə, Moskvada təhlükəsizlik qüvvələri yüksək hazırlıq vəziyyətinə gətirilib, Rostov vilayətində isə Priqojinin bəyanatlarından sonra çağırışçılar silahlanır.

Turan İSMAYIL