Nigerdə çevrilişdən sonra vəziyyət qeyri-müəyyən olaraq qalır
Niger Prezidenti Məhəmməd Bazumun prezident qvardiyasının üzvlərinin başçılıq etdiyi çevriliş nəticəsində saxlanılıb vəzifəsindən uzaqlaşdırılmasından iki gün keçsə də, ölkəni kimin idarə etdiyi və ya vasitəçilik səylərinin davam edib-etmədiyi hələ də bəlli deyil.
Redaktor.az xarici mediaya istinadla xəbər verir ki, hərbçilər hələ ki özlərinə lider elan etməyib və 1960-cı ildə Fransa müstəmləkəsindən qurtulduqdan sonra 2021-ci ildə Nigerin ilk demokratik yolla seçilən prezidenti Məhəmməd Bazum istefa verməyib.
İyulun 27-də ordu rəhbəri yaydığı bəyanatda bildirib ki, "qan gölünə" səbəb ola biləcək "qarşıdurmadan" qaçmaq üçün o, çevrilişi dəstəkləyəcək.
Ölkə daxilində çevriliş tərəfdarları ilə prezidentə sadiq insanlar arasında gərginlik yüksək olaraq qalır.
Prezident Bazum X platformasında (Twitter) yayımlanan bəyanatında ölkədə demokratiyanın qalib gələcəyini bildirib. Xarici işlər naziri Hassoumi Massoudou da "France 24"də çıxış edərək, Niger xalqını qiyama qarşı durmağa çağırıb.
Hələ ki hökumətdən və ya qiyam edən əsgərlərdən heç bir ictimai bəyanat yoxdur və ya hər hansı vasitəçilik müzakirələri ilə bağlı yenilik olmayıb.
Bizi Telegram-da izləyin...
