Belarusda Polşa ilə döyüşmək istəmədiklərini bəyan etdilər
Əgər Belarus ərazisində Rusiyanın taktiki nüvə silahı olmasaydı, Polşa respublikaya çoxdan hücum etmişdi.
Redaktor.az xəbər verir ki, bu fikri “İzvestiya”ya Liberal Demokrat Partiyasının sədri, Belarus Milli Assambleyasının Nümayəndələr Palatasının deputatı Oleq Qaydukeviç səsləndirib.
“Belarus ərazisində müharibə artıq alovlana bilərdi, Polşanın Belarus ərazisinə müdaxiləsi olardı, çünki Polşa bu gün amerikalılara tabedir, Avropada müharibənin alovlanması amerikalılar üçün faydalıdır və Belarus ərazisində rus taktiki nüvə silahları olmasaydı, belə bir əmr çoxdan verilmiş olardı. Onlar yaxşı bilirlər ki, biz bunu hücum edənlərə deyil, qərar qəbul edən mərkəzə tətbiq edəcəyik”, - o, deyib.
Deputat vurğulayıb ki, 2020-ci ildə Belarusda dövlət çevrilişinə cəhd zamanı Qərb respublikaya öz qoşunlarını yeritmək imkanını ciddi şəkildə nəzərdən keçirirdi.
Qaydukeviçin sözlərinə görə, hazırda Minsk Varşavanın təxribatlarına boyun əyməyəcək, çünki onun qonşu ölkə ilə müharibəyə ehtiyacı yoxdur.
“Biz sülhsevər insanlarıq. Lukaşenko sülh istəyir, Putin sülh istəyir. Müharibədən qaçmaq üçün müdafiə qabiliyyətini gücləndirmək lazımdır. Ona görə də sərhəddə daha çox yeni qüvvələr və vasitələr olacaq ki, potensial düşmənlərimiz bilsinlər ki, başını soxsan – sənə yaxşı heç nə gəlməyəcək. Bu, müharibənin qarşısını almağın yeganə yoludur. Və əminəm ki, biz bunun qarşısını ala bilərik”, - deyə parlamentari yekunlaşdırıb.
Xatırladaq ki, bu gün səhər saatlarında Belarusun müdafiə naziri general-leytenant Viktor Xrenin 11-ci Beynəlxalq Təhlükəsizlik üzrə Moskva Konfransında çıxışı zamanı deyib ki, gələcəkdə NATO ilə birbaşa hərbi toqquşma ehtimalı olduqca artır.
Turan İSMAYIL
Bizi Telegram-da izləyin...
