Avropa İttifaqı Nigerdəki üsyançılara qarşı sanksiyalar tətbiq edəcək
Avropa İttifaqı (Aİ) ölkələri hərbi çevrilişin baş verdiyi Nigerlə əməkdaşlığı dayandıraraq onun təşkilatçılarına qarşı sanksiyalar tətbiq etmək niyyətindədir.
Redaktor.az xəbər verir ki, bu barədə Almaniya Xarici İşlər Nazirliyi "X" (keçmiş tviter) sosial şəbəkəsində yazıb.
"İnkişaf və təhlükəsizlik sahəsində əməkdaşlığın dayandırılmasından sonra biz Aİ-də indi üsyançılara qarşı sanksiyalar tətbiq etmək istəyirik" - nazirlik bildirib.
Almaniya Xarici İşlər Nazirliyi də Nigerdəki böhranın həlli istiqamətində Afrika ölkələrinin səylərini dəstəklədiyini bildirib və hədəfin Nigerdə konstitusiya nizamını bərpa etmək olduğunu bildirib.
Bununla bağlı Almaniyanın xarici işlər naziri Annalena Burbok çevrilişə qarşı çıxan Niger prezidenti vəzifəsini icra edən Hassumi Məsud, Afrika İttifaqı Komissiyasının sədri Musa Fəqi Məhəmməd, ABŞ dövlət katibi Entoni Blinken və Fransanın xarici işlər naziri Ketrin Kolonna ilə danışıqlar aparıb.
Bundan əlavə, Qərbi Afrika Ölkələri İqtisadi Birliyinin (ECOWAS) səylərini dəstəkləmək məqsədilə Almaniya Xarici İşlər Nazirliyinin nümayəndələri Nigeriyanın paytaxtı Abucada danışıqlar aparıblar.
Xatırladaq ki, iyulun sonunda Niger ordusu milli televiziya ilə prezident Məhəmməd Bazumu hakimiyyətdən uzaqlaşdırdığını elan edib. Əksər Qərb ölkələrinin və ECOWAS liderləri çevrilişi pisləyiblər. Avqustun əvvəlində ECOWAS ölkələri Nigerə hərbi müdaxilə halında plan qəbul ediblər.
Turan İSMAYIL
Bizi Telegram-da izləyin...
