AŞPA Rusiyanı diktatura kimi tanıdı
Avropa Şurası Parlament Assambleyasının (AŞPA) komitəsi Rusiya Konstitusiyasına Vladimir Putinin 2036-cı ilə qədər hakimiyyətdə qalmasına imkan verən dəyişikliklərin legitimliyi və qanuniliyi ilə bağlı narahatlığını bildirib.
Redaktor.az bu barədə AŞPA-nın bəyanatına istinadən xəbər verir.
AŞPA-nın Hüquq Məsələləri və İnsan Haqları Komitəsi Rusiya Konstitusiyasına 2020-ci ilin iyulunda edilən dəyişikliklərlə bağlı narahatlığını bildirib. Bu düzəlişlər, digər məsələlərlə yanaşı, prezidentlik müddətinə məhdudiyyətləri aradan qaldırır və Putinə 2036-cı ilə qədər, yəni 83 yaşı tamam olana qədər prezident olaraq qalmağa imkan verir.
“Prezidentin hədsiz uzun müddət fəaliyyət göstərməsi nəticəsində yaranan böyük səlahiyyət, güclü parlament, müstəqil məhkəmə sistemi, azad media və canlı vətəndaş cəmiyyəti kimi heç bir nəzarət və tarazlığın olmaması ilə birləşərək, Rusiya dövlətinin mövqeyini dəyişdi. Federasiya de-fakto diktaturaya çevrilir." - deyə parlamentarilər bildiriblər.
Komitə yekdilliklə qərar layihəsini təsdiqləyib. Parlamentarilər həmçinin Avropa Şurasının Venesiya Komissiyasının “hazırkı prezidentin səlahiyyət müddətinin məhdudlaşdırılmasından imtina etməsi həm Rusiya konstitusiyasını, həm də beynəlxalq hüquq prinsiplərini pozur” qənaətini xatırladıblar.
O əlavə edib ki, Rusiyanın Ukraynaya təcavüzü və onun nəticələri diktaturaların “beynəlxalq sülh və təhlükəsizliyi, qonşularının ərazi bütövlüyünü və siyasi müstəqilliyini təhdid etdiyini” nümayiş etdirir.
Bunu nəzərə alsaq, Rusiyada demokratiyanın bərpası ilk növbədə ölkə əhalisinin, eləcə də Avropanın və bütün dünyanın maraqlarına cavab verir.
Bundan başqa, Komitə Rusiya liderlərinin, o cümlədən Putinin Krımın qeyri-qanuni ilhaqı, Donbassdakı müharibə və MH17 reysinin vurulmasından tutmuş hərəkətlərinə görə məsuliyyət daşıması üçün gələcək xüsusi beynəlxalq cinayət tribunalının yaradılmasını dəstəklədiyini bir daha təsdiqləyib.
Xatırladaq ki, 2020-ci ilin yayında Rusiyada Konstitusiyaya əlavə və dəyişikliklərlə bağlı səsvermə keçirilib. Əsas məqamlardan biri Putinin əvvəlki prezidentlik müddətlərinin artıq nəzərə alınmaması qaydası idi. Bu, ona 2024-cü il seçkilərində iştirak etməyə və potensial olaraq 2036-cı ilə qədər hakimiyyətdə qalmağa imkan verəcək.
Turan İSMAYIL
Bizi Telegram-da izləyin...
