Pentaqon hökumətin fəaliyyətinin dayandırılmasından narahatlığını bəyan etdi
ABŞ Müdafiə Nazirliyi ABŞ Konqresindən ölkənin federal hökumətinin fəaliyyətinin dayandırılmasının (bağlanmasının) qarşısını almaq üçün mümkün olan hər şeyi etməyi xahiş edir, çünki bu, müdafiə departamentinin fəaliyyəti üçün ən pis ssenari olardı.
Redaktor.az TASS-a istinadla xəbər verir ki, bu barədə Pentaqonun mətbuat katibinin müavini Sabrina Sinq növbəti brifinqdə bildirib.
"Konqres hökumətin bağlanmasının qarşısını almaq və büdcəni qəbul etmək üçün ikitərəfli qaydada işləməlidir. Qapanma müdafiə departamenti üçün ən pis ssenaridir" - o, deyib.
Sinq bildirib ki, hökumətin bağlanması halında Pentaqonun hərbi qulluqçuları ödənişsiz işləməyə məcbur olacaq və onların yüzlərlə və minlərlə mülki həmkarları ödənişsiz məzuniyyətə göndəriləcək. “Bu baxımdan biz ABŞ Konqresindən öz işini görməsini və hökuməti maliyyələşdirməsini xahiş edirik”, - deyə Pentaqonun sözçüsü yekunlaşdırıb.
Qeyd edək ki, cümə axşamı günü ABŞ prezidenti Co Bayden federal hökumətin mümkün bağlanmasının uzunmüddətli perspektivdə ölkə üçün fəlakətli nəticələrə səbəb olacağını söyləyib. Avqustun sonunda Ağ Ev Konqres üzvlərindən bir neçə federal departamentin mümkün bağlanmasının qarşısını almaq üçün hökumətin maliyyələşdirilməsini qısa müddətə uzatmaq təşəbbüsünü qəbul etməyi xahiş edib. Sentyabrın sonuna qədər qanunvericilər növbəti maliyyə ili üçün büdcəni qəbul etməsələr, ABŞ hökuməti bir müddət fəaliyyətini dayandırmalı olacaq.
Bloomberg-in məlumatına görə, bağlanma halında, xüsusən də ABŞ-ın Ukraynaya silah tədarükü səngiyəcək. Bundan əlavə, onun mənbələrinə görə, Müdafiə Nazirliyi bağlanmanın Pentaqonun Müqavilə İdarəetmə Administrasiyası (DCMA) tərəfindən hərbi texnika və sursat istehsalına dair təsdiqlərin də dayandırılmasına səbəb olacağından ehtiyat edir. Bu halda silah istehsalı qrafiki dəyişəcək.
Turan İSMAYIL
Bizi Telegram-da izləyin...
