"Telegram" HƏMAS kanalını blokladı
"Telegram" messencerinin "Google Play" qaydalarına uyğun olaraq Android istifadəçiləri üçün Fələstinin HƏMAS radikal hərəkatının rəsmi kanalına çıxışı məhdudlaşdırılıb.
Redaktor.az bu barədə TASS-a istinadla xəbər verir.
Android sistemi üçün tətbiqin son versiyasının istifadəçilərinə göndərilən mesajda deyilir: “Abunə olduğunuz bəzi kanallara giriş Google Play siyasətlərinə uyğun olaraq sizin Telegram versiyanızda məhdudlaşdırıla bilər”.
HƏMAS kanalına keçməyə çalışan zaman belə bir bildiriş görünür: “Bu kanala giriş məhdudlaşdırılıb”.
HƏMAS-ın silahlı qanadı İzzəddin əl-Qəssam Briqadalarının Telegram kanalı da bağlanıb, hərəkatın rəsmi nümayəndəsi İzzət ər-Rişqanın kanalı isə hələ də açıqdır. HƏMAS-ın müttəfiqi İslami Cihad təşkilatı və Livanın şiə Hizbullah hərəkatının kanalları hələ də bağlanmayıb.
Messenger Android istifadəçilərinə HƏMAS kanallarının baxa biləcəyi variant təklif edir: bunun üçün rəsmi Telegram saytından xüsusi müştəri yükləmək lazımdır – o, adi versiyada bloklanmış bütün Telegram kanallarını açır.
Oktyabrın 13-də Telegram-ın yaradıcısı Pavel Durov öz bloqunda bildirib ki, Fələstinin HƏMAS radikal hərəkatının messencerdəki kanalının bağlanması Fələstin-İsrail münaqişəsi zonasında baş verənlər haqqında məlumatla bağlı vəziyyəti pisləşdirə bilər. X sosial şəbəkəsi (keçmiş Twitter) HƏMAS və onun liderlərinin hesablarını dayandırıb, Google isə hərəkatın rəsmi saytını bloklayıb. Bundan əlavə, çərşənbə axşamı, oktyabrın 24-də Bloomberg mənbələrə istinadən xəbər verib ki, Google İsrail ordusunun tələbi ilə İsrail və Qəzza zolağında Google Maps və Waze proqramlarında trafik məlumatlarını deaktiv edib.
Turan İSMAYIL
Bizi Telegram-da izləyin...
