Çinin müdafiə naziri Rusiyaya görə işdən çıxarılıb?
Çin rəhbərliyinin Rusiyadan silah almasına görə ABŞ-ın sanksiyaları altında olan müdafiə naziri Li Şanfunu vəzifəsindən uzaqlaşdırmaq qərarı Pentaqonun yüksək rütbəli nümayəndə heyətinin Pekinə gəlməsinə bir neçə gün qalmış verilib.
Redaktor.az TASS-a istinadla xəbər verir ki, Honq-Konqun “South China Morning Post” qəzetinin yazdığına görə, müdafiə departamenti rəhbərinin istefası Çin Xalq Azadlıq Ordusu rəhbərliyi ilə Pentaqon arasında əlaqələrin bərpasına yol açır.
ABŞ hərbi nümayəndə heyəti bu həftə Pekində açılan və adətən Çin müdafiə departamentinin rəhbərinin rəhbərlik etdiyi Syanşan Təhlükəsizlik Forumunda iştirak edəcək. Qəzet hesab edir ki, müdafiə nazirinin vəzifəsindən kənarlaşdırılması “iki ölkənin uzun müddət dalana dirənmiş hərbi idarələri arasında dialoqa yol açır”.
Oktyabrın 29-31-də Pekində 10-cu Syanşan Təhlükəsizlik Forumu keçiriləcək. Burada 90-dan çox ölkə və beynəlxalq təşkilatlar iştirak edəcək.
2023-cü ilin martında Li Şanfunun müdafiə naziri vəzifəsinə təyin edilməsindən sonra Çin və ABŞ müdafiə başçıları arasında dialoq faktiki olaraq dondurulub. Bloomberg-in mənbələrə istinadən verdiyi məlumata görə, Pekin Amerika tərəfinə Vaşinqton Li Şanfuya qarşı sanksiyaları qaldırana qədər belə hərbi təmasların olmayacağını açıqlayıb.
Pentaqon rəhbəri Lloyd Ostin çinli həmkarının 2023-cü ilin iyununda Sinqapurda keçiriləcək Şanqri-La Dialoq təhlükəsizlik konfransında rəsmi görüş keçirməkdən imtina etdiyini bildirib. Buna baxmayaraq, konfrans zamanı Ostin və Li Şanfu şəxsən görüşdülər və əl sıxdılar, lakin tərəflər arasında heç bir “əsaslı fikir mübadiləsi” olmadı.
Qeyd edək ki, bundan əvvəl Ümumçin Xalq Nümayəndələri Yığıncağının Daimi Komitəsi (ölkə parlamentinin daimi orqanı) Li Şanfunun ÇXR Dövlət Şurasının üzvü və müdafiə naziri vəzifələrindən uzaqlaşdırılması barədə qərar qəbul edib. General iki aya yaxındır ki, ictimai sahədə yox idi: Çinin müdafiə naziri sonuncu dəfə avqustun 29-da Pekində keçirilən Sülh və Təhlükəsizlik üzrə 3-cü Çin-Afrika Forumunda çıxış edərkən ictimaiyyət qarşısında görünüb.
Oktyabrın 1-də qeyd olunan əsas milli bayram - Çin Xalq Respublikasının yaranması günü şərəfinə təşkil edilən qala-qəbulda Li Şanfu da görünməyib. Bu vəzifədə onun sələfi, keçmiş Çin müdafiə naziri Vey Fenghe (2018-2023) də yox idi.
Bundan əvvəl Honq-Konqun “South China Morning Post” qəzeti mənbələrə istinadən yazıb ki, Çin Mərkəzi Hərbi Şurasının Birləşmiş Qərargah rəisi Liu Zhenli müdafiə naziri postuna təyin oluna bilər.
Turan İSMAYIL
Bizi Telegram-da izləyin...
