Pentaqon və Dövlət Departamentinin müfəttişləri Kiyevdədir
Amerikanın əsas departamentlərinin, o cümlədən Müdafiə Nazirliyi və Dövlət Departamentinin üç baş müfəttişi Kiyevə gəlib və burada Ukraynanın aldığı yardımın paylanmasına nəzarət məsələsini müzakirə edəcəklər.
Redaktor.az TASS-a istinadən xəbər verir ki, bu barədə ABŞ-ın Ukraynadakı səfiri Bridcet Brink bildirib.
"Mən Kiyevdə Müdafiə Departamentinin, Dövlət Departamentinin və ABŞ Beynəlxalq İnkişaf Agentliyinin (USAID) üç baş müfəttişini salamlamaqdan məmnunam. Onların icraçılar, tərəfdaşlar və Ukrayna hökuməti ilə görüşləri ABŞ yardımına nəzarət və hesabatlılığa töhfə verir”, – diplomat X platformasında yazıb.
Yanvarda ABŞ-ın müdafiə naziri Lloyd Ostin bildirmişdi ki, Birləşmiş Ştatlar Ukrayna tərəfindən ona verilən Amerika silahlarından sui-istifadə halları aşkar etməyib və Kiyevə hərbi yardımın çatdırılmasına diqqətlə nəzarət etməkdə davam edir.
Daha əvvəl ABŞ Müdafiə Nazirliyinin Baş Müfəttişliyi İdarəsi bildirmişdi ki, Pentaqonun “Ukraynaya müdafiə təchizatı üçün son istifadəyə nəzarət tələblərinə tam əməl edə bilməyib”. Onun hesablamalarına görə, 2023-cü ilin iyun ayına olan məlumata görə, Kiyev üçün dəyəri 1 milyard dollardan çox olan hərbi texnikanın inventarizasiyası vaxtında tamamlanmayıb.
“The New York Times”ın hesabata əsaslanan hesablamalarına görə, ABŞ səlahiyyətliləri təxminən 40 min silaha görə məsuliyyəti lazımi səviyyədə təmin edə bilməyib. Yanvarın 11-də Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi bildirib ki, Vaşinqton administrasiyası Kiyevə verilən silahlara görə daha böyük məsuliyyəti təmin etmək və baş müfəttişin hesabatını ətraflı nəzərdən keçirmək niyyətindədir.
NƏRGİZ
Bizi Telegram-da izləyin...
