Bolqarıstan fermerləri ayağa qalxdı - yollar bağlandı
Bolqarıstanlı fermerlərin etirazları ölkədə tıxaclara səbəb olan əsas yolları bağlayıb.
Redaktor.az TASS-a istinadən xəbər verir ki, Milli Taxıl İstehsalçıları Assosiasiyasının məlumatına görə, ümummilli etirazın ilk günündə kənd təsərrüfatı maşınları saat 10:00-dan ölkə yollarında 80-ə yaxın əsas nöqtəni bağlayıb, nəqliyyatın hərəkətinə mane olub.
Qeyd edilib ki, saat 12:00-da etiraz aksiyası başa çatıb, lakin çərşənbə günü yenidən təkrarlanacaq və bir saat daha davam edəcək.
"Əgər müsbət reaksiya olmasa, gələn həftədən yollar həmişəlik bağlanacaq", - fermerlərin nümayəndəsi Kostadin Kostadinov Bolqarıstan Milli Televiziyasına müsahibəsində bildirib.
Fermerlərin etiraz aksiyalarına başlamaq qərarı bazar günü baş nazir Nikolay Denkovun iştirakı ilə hakimiyyətlə danışıqlardan sonra qəbul edilib; fermerlər nə təklif olunan kompensasiyanın məbləğindən, nə də kompensasiya əsasında onun hesablanması üsulundan narazı qalıblar. Onlar iddia edirlər ki, vergi bəyannaməsində təsərrüfatların maliyyə itkiləri göstərilmir. Assosiasiya nümayəndələri Bolqarıstan kənd təsərrüfatında mümkün kütləvi iflaslar barədə xəbərdarlıq edərək, yardımların bölüşdürülməsi və büdcənin artırılması mexanizmlərinə yenidən baxılmasında israrlıdırlar. Onlar həmçinin sektorun davamlı inkişafına zəmanət verən qanunvericilikdə dəyişiklikləri tələb edirlər.
Bolqarıstanın Baş naziri daha əvvəl bəyan etmişdi ki, o, “etirazlar üçün heç bir əsas görmür”, lakin hakimiyyət danışıqlara hazırdır.
Ekspertlər hesab edir ki, aqrar sektorda problemlərin yaranmasına səbəb həddən artıq iddialı ekoloji proqramdır.
Turan İSMAYIL
Bizi Telegram-da izləyin...
