Ukrayna Litvadan yeni hərbi yardım paketi aldı
Litva Ukraynanın qəddar işğalçıya qarşı çətin mübarizəsini yüngülləşdirmək üçün səylərini davam etdirir. Fevralın 9-da Ukraynaya daha bir hərbi yardım paketi gəlib.
Redaktor.az xəbər verir ki, bu barədə RBC-Ukrayna Litva Müdafiə Nazirliyinin mətbuat xidmətinə istinadən məlumat yayıb.
Bu dəfə Litva Silahlı Qüvvələri qış mövsümü üçün lazım olan texnikanı və on minlərlə dəst isti geyimi gətirib Ukrayna hərbçilərinə təhvil verib.
"Biz on minlərlə Ukrayna əsgərini açıq hava şəraitində soyuq mövsüm üçün lazım olan avadanlıq və geyimlə təmin edirik. Hər bir dəstək paketimiz qələbəyə doğru əlavə addımdır", - Litvanın müdafiə naziri Arvydas Anusauskas deyib.
Qeyd edək ki, Litva Rusiyanın genişmiqyaslı işğalı başlayandan bəri Ukraynanın ən fəal müttəfiqlərindən biri olub. O, Ukrayna müdafiəçilərinə hərbi yardım göstərir, həmçinin ölkəni Avropa İttifaqı və NATO-ya üzvlüyünü dəstəkləyir.
Yanvarda Litva Ukraynaya 200 milyon avro dəyərində uzunmüddətli yardım paketini təsdiqləyib. Bu barədə Prezident Gitanas Nauseda Kiyevə səfəri zamanı bildirib.
Həmçinin Litvanın Baş naziri İnqrida Simonyte bu yaxınlarda Avropa İttifaqını Rusiyanı məğlub etmək üçün Ukraynaya yardımı artırmağa çağırıb.
Turan İSMAYIL
Bizi Telegram-da izləyin...
