Almaniya Trampın NATO ilə bağlı bəyanatlarını “məsuliyyətsizlik” adlandırdı
Almaniyanın vitse-kansleri, iqtisadiyyat və iqlim mühafizəsi naziri Robert Habek ABŞ-nin keçmiş prezidenti Donald Trampın NATO ilə bağlı bəyanatlarını kəskin tənqid edərək, bunları “məsuliyyətsizlik” adlandırıb.
Redaktor.az xəbər verir ki, o, bu barədə Leypsiqdə RND redaksiya assosiasiyası tərəfindən təşkil edilən tədbirdə deyib.
“Mən Donald Trampın bəyanatlarını bir neçə cəhətdən məsuliyyətsiz hesab edirəm. Onlar müqavilələrə əməl etməyə, hərbi ittifaq çərçivəsində müttəfiq öhdəliklərinin mövcudluğuna ümid edənlərə qarşı məsuliyyətsizdirlər” - deyə nazir vurğulayıb.
Eyni zamanda, Habek Rusiyanın Ukraynada qələbəsinin siyasi məqsədlərə hərbi yolla nail ola biləcəklərinə inananların hamısı üçün bir siqnal olacağını bildirib. "O zaman hər yerdə müharibələr olacaq. Bu, səy göstərdiyimiz sülh ola bilməz", - Almaniyanın vitse-kansleri deyib.
Qeyd edək ki, fevralın 10-da Respublikaçılar Partiyasından ABŞ prezidentliyinə namizədliyini irəli sürmək istəyən Tramp Cənubi Karolinada tərəfdarları qarşısında çıxış edərkən Amerika prezidenti olarkən NATO üzvü olan ölkələrin liderləri ilə keçirdiyi görüşlərdən birindən danışıb. Onun sözlərinə görə, daha sonra xarici həmkarlarından biri ondan müttəfiqlərdən biri NATO-ya kollektiv müdafiə üçün töhfələr ödəmədiyi halda, Rusiyadan ehtimal edilən təhlükə zamanı ABŞ-nin alyansı müdafiə etməyə hazır olub-olmadığını soruşub. Tramp belə bir ölkəni müdafiə etməyəcəyini və üstəlik Rusiyanı “istədiyini etməyə” təşviq edəcəyini bildirib. Eks-prezident bu söhbətin nə vaxt və harada baş verdiyini, həmsöhbətinin kim olduğunu açıqlamayıb.
Turan İSMAYIL
Bizi Telegram-da izləyin...
