Polşalı fermerlər Avropa Komissiyasının ofisinə yumurta atdılar
Polşalı fermerlər ölkənin cənub-qərbindəki Vroslav şəhərinin mərkəzində keçirilən nümayişdə Avropa Komissiyasının (AK) ofisinin binasına yumurta atıblar.
Redaktor.az xəbər verir ki, bu barədə PAP agentliyi məlumat yayıb.
Bildirilib ki, fermerlər səhər saatlarında şəhərin mərkəzində, AK-nin ofisinin yerləşdiyi Vidocq küçəsində toplaşıblar. Təşkilatçıların sözlərinə görə, aksiyada ən azı 1 min nəfər iştirak edib. Etiraz edən fermerlər təkərləri yandırıblar, fişəngləri partladıblar, həmçinin AK-nin ofis binasına yumurta atıblar.
Nümayişin başlanmasından bir neçə dəqiqə sonra təşkilatçılar aksiyanın saat 17:00-a qədər davam edəcəyi barədə əvvəlcədən bildirilmiş planlara baxmayaraq, onun başa çatdığını elan ediblər. Bununla belə, Polşa mediasının məlumatına görə, şəhərdə Avropa Birliyinin 2050-ci ilə qədər karbon emissiyasını sıfıra endirməyi nəzərdə tutan Yaşıl Sövdələşmə strategiyasına qarşı nümayişlər davam edir.
Qeyd edək ki, daha əvvəl TOK FM radiostansiyası fermerlərin Ukraynadan kənd təsərrüfatı məhsullarının idxalına və Avropa İttifaqının siyasətinə etiraz edərək Vroslav küçələrinə yüzlərlə kənd təsərrüfatı texnikası gətirdiklərini bildirib. Fevralın 9-da Polşada 260 yerdə fermerlərin etiraz aksiyaları eyni vaxtda başlayıb. Fermerlər Ukraynadan ucuz kənd təsərrüfatı məhsullarının idxalını məhdudlaşdırmağı və ya tamamilə qadağan etməyi, milli heyvandarlığa dəstəyi gücləndirməyi tələb edir, həmçinin Avropa İttifaqının 2050-ci ilə qədər sıfır karbon emissiyasına nail olmağı nəzərdə tutan Yaşıl Sövdələşmə strategiyası ilə razılaşmadıqlarını bildirirlər. Fermerlərin etirazları Polşa Kənd Təsərrüfatı Nazirliyi tərəfindən dəstəklənir.
Turan İSMAYIL
Bizi Telegram-da izləyin...
