Qəzzada 700 mindən çox insan aclıqdan ölə bilər - BƏYANAT
![](https://img.redaktor.az/news/2024/02/photo_232409.jpg?v=MDM6MjkyMDI0LTAyLTIwIDIwOjAzOjEx)
İsrailin blokadası altında olan Qəzza zolağında aclığın şiddətlənməsi səbəbindən 700 mindən çox insan ölüm təhlükəsi ilə üzləşib.
Redaktor.az TASS-a istinadən xəbər verir ki, bu barədə Fələstin anklavı hökumətinin Rusiya, Çin və Türkiyəyə sektordakı blokadanın aradan qaldırılmasına köməklik göstərməsi üçün müraciətində deyilir.
“Təxminən 2 milyon 400 min insanın yaşadığı Qəzza zolağının əyalətlərində, xüsusən də Qəzza və Şimali Qəzza əyalətlərində 700 mindən çox fələstinlinin ölümü ilə nəticələnə biləcək humanitar fəlakətlə təhdid edən aclıq hər gün daha da şiddətlənir. Biz Rusiya, Çin, Türkiyə, Ərəb Liqası, İslam Əməkdaşlıq Təşkilatı, Körfəz Əməkdaşlıq Şurasını Qəzza zolağının blokadasını təcili olaraq aradan qaldırmağa və Fələstin xalqının aclığını dayandırmağa çağırırıq ki, işğaçıya təzyiq göstərin ki, mülki əhaliyə, uşaqlara və qadınlara qarşı müharibə mümkün qədər tez dayandırılsın”, - deyə hökumətin mətbuat xidmətinin yaydığı bəyanatda bildirilir.
Fələstin anklavı hökuməti humanitar fəlakətin qarşısını almaq üçün yaxın iki gün ərzində 10 min yük maşını yardım göndərilməsini istəyib.
Qeyd edək ki, Fələstin radikal HƏMAS hərəkatının yaraqlılarının 2023-cü il oktyabrın 7-də Qəzza zolağından İsrail ərazisinə soxulması, sərhəd yaşayış məntəqələrinin sakinlərinin öldürülməsi və 200-dən çox girovun əsir götürülməsi ilə müşayiət olunan Yaxın Şərqdə vəziyyət kəskin şəkildə pisləşib. Radikallar bu hücumu İsrail hakimiyyətinin Qüdsdəki Əl-Əqsa məscidinə qarşı hərəkətlərinə cavab adlandırıblar. İsrail Qəzzanı tam blokadaya aldığını elan edərək, Livan və Suriyanın zolağına və müəyyən bölgələrinə qarşı cavab tədbirləri görməyə başlayıb. İordan çayının qərb sahilində də toqquşmalar baş verir.
Turan İSMAYIL