Fransanın müdafiə naziri ilk dəfə Ermənistana səfər edəcək

 13:09 22.02.2024     211

Fransanın müdafiə naziri Sebastyan Lekornu yaxın vaxtlarda Ermənistana səfər edəcək.

Redaktor.az xəbər verir ki, o bu barədə "Lekornu RTL" radiosunda məlumat verib.

"Mən yaxın vaxtlarda parlamentarilər və istehsalçılardan ibarət böyük nümayəndə heyətinin başında Ermənistana gedəcəyəm. Bu, tarixdə ilk dəfədir ki, Fransanın müdafiə naziri Ermənistana gedir", - o deyib.

Nazirin iddiasına görə, Ermənistan ciddi təhlükəsizlik problemləri, o cümlədən Azərbaycandan gələn təhdidlərlə bağlı suverenlik və sərhədlərin mühafizəsi məsələləri ilə üz-üzədir.

O qeyd edib ki, Fransa Ermənistanın müdafiə potensialını artırmaq üçün ona dəstək vermək öhdəliyi daşıyır.

"Söhbət havadan müdafiə avadanlığından və zirehli maşınlardan gedir, lakin sırf müdafiə məqsədləri üçün” - Lekornu əlavə edib.

Xatırladaq ki,  2023-cü ilin oktyabrında Parisdə Ermənistan və Fransanın müdafiə nazirləri Suren Papikyan və Sebastyan Lekornu Ermənistana silah tədarükü haqqında saziş imzalayıblar. Fransa Ermənistana 24 “Bastion” tipli zirehli transportyor tədarük edib, daha 26-sı isə istehsal mərhələsindədir.

İrəvan bu yaxınlarda "Thales"dən üç GM200 radarı sifariş edib və MISTRAL 3 zenit-raket komplekslərinin tədarükü ilə bağlı da danışıqlar aparılır. Bundan başqa, Fransa Senatı hakimiyyəti mümkün olduğu qədər tez "Sezar" özüyeriyən artilleriyasının tədarükü imkanlarını araşdırmağa çağırıb.

Turan İSMAYIL