Amerika gəmisinin üç dənizçisi hücumdan sonra itkin düşüb
Barbados bayraqlı Amerika yük daşıyan gəmisinin 3 ekipaj üzvü itkin düşüb, Yəmən sahillərində gəmiyə hücum nəticəsində dörd nəfər ciddi yanıqlar alıb.
Redaktor.az xəbər verir ki, bu barədə gəmiçilik sənayesindəki adı açıqlanmayan mənbələrə istinadən "Reuters" agentliyi məlumat yayıb.
Agentliyin həmsöhbətlərinin sözlərinə görə, gəminin adı "True Confidence"dir və hazırda bütün ekipaj üzvləri onu tərk ediblər.
Böyük Britaniya Dəniz Ticarət Əməliyyatları (UKMTO) tərəfindən daha əvvəl bildirildiyi kimi, yük daşıyan gəmiyə hücum Bakı vaxtı ilə saat 12:40-da, Yəmənin Ədən şəhərindən 54 dəniz mili cənub-qərbdə baş verib. Bildirilib ki, özlərini Yəmən Hərbi Dəniz Qüvvələrinin üzvləri adlandıran şəxslər gəmi ilə əlaqə saxlayıb və gəmiyə istiqaməti dəyişmək barədə göstəriş veriblər. Gəmiyə Qırmızı dənizdə naviqasiya təhlükəsizliyini təmin etmək üçün “Prosperity Guardian” əməliyyatını həyata keçirən koalisiya qüvvələri kömək edir.
T.İSMAYIL
Bizi Telegram-da izləyin...
