Qazaxıstanda daşqınlarla bağlı son vəziyyət AÇIQLANDI
Qazaxıstanda mart ayında başlayan irimiqyaslı daşqınlarla bağlı vəziyyət stabilləşir.
Redaktor.az TASS-a istinadla xəbər verir ki, bunu respublikanın Baş naziri Oljas Bektenov operativ müşavirədə deyib.
"Daşqınlarla bağlı vəziyyət stabilləşir. Qərbi Qazaxıstan vilayətində yüksək suyun pik həddi keçib. Burada bütün cəlb olunmuş bölmələrin koordinasiyalı işini qeyd etmək lazımdır. Birgə tədbirlər sayəsində 84 yaşayış məntəqəsinin su basmasının qarşısı alınıb, bölgədə daşqınların nəticələri minimuma endirilib", - deyə hökumət rəhbəri bildirib.
Eyni zamanda, Bektenov qeyd edib ki, bu gün üçün əsas vəzifə Atırau vilayətinin hazırlanmasıdır. Baş nazirin sözlərinə görə, Ural çayının suyunun səviyyəsi hər gün qalxır, təxminən 100 sm təhlükəli həddə qalır:
“İndi Atırau vilayətinə çoxlu su axır, yaxın günlərdə pik həddə qalxacağı gözlənilir, biz bütün qüvvələri səfərbər etməliyik, digər bölgələrdən əlavə qüvvələr cəlb etmək üçün Qərbi Qazaxıstan regionunun təcrübəsindən istifadə etmək lazımdır. Su səviyyəsinin saatlıq monitorinqi, qoruyucu bəndlərin uzunluğunu və hündürlüyünü artırmaq üçün bölgəni müdafiə etməli və daşqınların qarşısını almalıyıq”.
Sonda hökumət başçısı qeyd edib ki, daşqın təhlükəsi bütün ölkəni böyük ölçüdə keçib. “Prezident təbii fəlakətlərdən zərər çəkmiş evlərin bərpasını, zərər çəkmiş vətəndaşların normal həyata qaytarılmasını qarşıya prioritet vəzifə kimi qoymuşdur bu addımlar aydın və ardıcıl şəkildə atılmalıdır”, - Bektenov əlavə edib.
Müşavirədə həmçinin qeyd edilib ki, Atırau vilayətində fövqəladə xilasetmə işlərinə 13 mindən çox insan və 1,2 mindən çox texnika cəlb olunub. Eyni zamanda, regionda 500 km-dən çox bəndlər, o cümlədən Atırau şəhərinin yaşayış massivləri boyunca 242 km-dən çox bənd tikilib, 4,8 milyon ədəddən çox kisə konteynerlərindən istifadə olunub. Xəzər dənizində Ural çayının mənsəbində dərinləşdirmə işləri də davam edir.
T.İSMAYIL
Bizi Telegram-da izləyin...
