İsrail ordusu Rəfaha daxil olacaq - ABŞ xəbərdar edildi
![](https://img.redaktor.az/news/2024/05/photo_239957.jpg?v=MDQ6MTkyMDI0LTA1LTAzIDIyOjIwOjA2)
İsrail hərbçiləri ABŞ Prezidenti Co Baydenin administrasiyasını quru əməliyyatı başlamazdan əvvəl Qəzza zolağının cənubundakı Rəfah şəhərindən mülki əhalinin çıxarılması planları barədə xəbərdar edib.
Redaktor.az xəbər verir ki, bu barədə “Politico” qəzeti mənbələrə istinadən məlumat yayıb.
Nəşrin xəbərinə görə, İsrail Müdafiə Qüvvələrinin nümayəndələri bu həftə Amerika administrasiyasına və humanitar təşkilatlara “insanları Rəfahdan çıxarmaq üçün plan hazırladıqlarını” bildiriblər. Nəşr bildirib ki, İsrail hərbçiləri Rəfah əhalisini Qəzza zolağının sahilindəki Əl-Məvasidəki evakuasiya zonasına çəkməyi gözləyir.
"Wall Street Journal" cümə günü mənbələrə istinadən yazıb ki, İsrail Fələstinin radikal HƏMAS hərəkatına atəşkəs təklifini qəbul etmək üçün bir həftə vaxt verib, əks halda Rəfahda hərbi əməliyyata başlayacaq. Öz növbəsində, "Reuters" xəbər verir ki, ABŞ Mərkəzi Kəşfiyyat İdarəsinin (MKİ) direktoru Uilyam Börns Qəzza zolağında atəşkəsə nail olmaq üçün danışıqlar prosesində iştirak etmək üçün Qahirəyə gəlib.
Bundan əvvəl bir çox dünya liderləri və beynəlxalq təşkilatlar dəfələrlə İsrail hakimiyyətini Rəfaha qoşun göndərməkdən imtina etməyə çağırıblar. ABŞ hesab edir ki, İsrailin şəhərə quru qoşunları göndərmək planı oradakı mülki əhaliyə zərər verəcək və yəhudi dövlətinin təhlükəsizliyini zəiflədəcək bir səhvdir.
Bu arada, Baş nazir Binyamin Netanyahunun rəhbərlik etdiyi İsrail hakimiyyəti əvvəllər dəfələrlə bəyan edib ki, onlar artıq təsdiqlənmiş Rafah əməliyyatı planlarından əl çəkməyəcəklər, çünki onların fikrincə, bu şəhərə qoşun yeridilməsi Fələstinin HƏMAS hərəkatının silahlı qüvvələri üzərində tam qələbə üçün əsas məsələdir. Öz növbəsində hakim koalisiyanın sağçı radikal qanadının nümayəndələri - maliyyə naziri Bezalel Smotriç (ifrat sağçı Dini Sionizm Partiyası) və milli təhlükəsizlik naziri İtamar Ben-Qvir (ifrat sağçı Yəhudi Gücü partiyası) hökuməti tərk etməklə hədələyiblər. Rəfah əməliyyatı dayandırılsa, koalisiyanın dağılmasına və yeni seçkilərin təyin edilməsinə səbəb ola bilər.
T.İSMAYIL