NATO Ukraynaya qoşun göndərməyi düşünür - ABŞ nəşri
NATO müttəfiqləri tədricən Ukraynaya qoşun yeritmək qərarına yaxınlaşır. Onlardan Ukrayna qüvvələrinə təlim keçmək üçün istifadə olunacaq.
Redaktor.az xəbər verir ki, bu barədə "The New York Times" yazıb.
“Bu addım əvvəlki qırmızı xəttin növbəti dəfə bulanıqlaşması olacaq və ABŞ və Avropanı birbaşa müharibəyə cəlb edə bilər”, - qəzet qeyd edib.
Nəşrin məlumatına görə, Ukraynanın qoşun yetişdirmək üçün gücü çatmır və Rusiyanın hücumu səbəbindən döyüş meydanında vəziyyət daha da pisləşib. Buna görə də Ukrayna rəsmiləri amerikalı və NATO həmkarlarından 150 000 əsgərin daha sürətli yerləşdirilməsi üçün cəbhə xəttinə yaxın təlim keçməsinə yardım etmələrini xahiş ediblər.
ABŞ bu ideyanı rəsmən dəstəkləməyib, lakin Birləşmiş Qərargah Rəisləri Komitəsinin sədri Çarlz Braun bu prosesi qaçılmaz hesab edir. Braun deyib ki, Ukraynada yerləşdirilən potensial NATO təlimçiləri risk altında ola bilər, ona görə də onları qorumaq üçün Ukraynanın döyüş meydanında istifadə edə biləcəyi hava hücumundan müdafiə sistemlərindən istifadə tələb olunacaq.
Eyni zamanda, Ağ Ev Ukraynaya hətta təlimatçılar göndərməkdən imtina edir və NATO üzrə müttəfiqlərini onlardan nümunə götürməyə çağırır.
Nəşr xatırladıb ki, ABŞ əvvəllər Yavorov poliqonunda NATO standartlarına uyğun olaraq qoşunların hazırlanmasında Ukraynaya yardım edib, lakin müharibənin əvvəlində onlar oradan çıxarılıb.
Bununla yanaşı, qəzet amerikalıların və onların müttəfiqlərinin təlimlərinin heç də həmişə uğurlu olmadığını qeyd edib. Keçən yay Ukrayna əks-hücumundan əvvəl amerikalı əsgərlər Almaniyada Ukrayna bölmələrinə manevr döyüşü, minalardan təmizləmə və digər tapşırıqlar üzrə təlim keçiblər.
"Lakin tanklardan, artilleriyadan və piyadalardan koordinasiyalı şəkildə istifadə etməyi öyrənmək çətindir, xüsusən də 12 həftəlik qısa müddətdə", - qəzet əlavə edib.
Turan İSMAYIL
Bizi Telegram-da izləyin...
