G7 ölkələri Rusiya aktivlərinin Ukraynaya verilməsi ilə bağlı razılığa gəldilər
G7 ölkələri ABŞ-nin dondurulmuş Rusiya aktivlərindən istifadə planı ilə bağlı razılığa gəliblər. Bu addım Ukraynaya 50 milyard dollara qədər həyati maliyyə təmin edəcək və onu Atlantikanın hər iki tərəfindəki siyasi dəyişikliklərdən qorumağa kömək edəcək.
Redaktor.az bu barədə "Bloomberg"ə istinadən xəbər verir.
Müzakirələrlə tanış olan rəsmilər deyirlər ki, G-7 hökumətləri hazırda ABŞ-nin Rusiya mərkəzi bankının 280 milyard dollarından gələcək gəlirlərinin Kiyevə krediti dəstəkləmək üçün istifadə etmək təklifini dəstəkləyir.
G7-nin maliyyə nazirləri bu həftə İtaliyanın Stresa şəhərində görüşərkən, liderlərinin 13-15 iyun iclasında yekun qərar qəbul etməsi üçün bir sıra variantları razılaşdırmaq məqsədi ilə bu məsələni müzakirə edirlər.
Anonim mənbələr bildiriblər ki, G7 ümumi razılaşmaya yaxınlaşsa da, bir çox vacib detallar hələ də müzakirə olunur və razılaşdırılmalıdır.
Onlar deyirlər ki, bunlara kreditin dəqiq mexanikası, əvvəlcədən toplanacaq pulun miqdarı və ən başlıcası riskin cəlb olunan tərəflər arasında necə bölüşdürüləcəyi daxildir.
Bununla belə, G7 ölkələri arasında Ukraynanın daha çox maliyyəyə ehtiyacı olacağına dair konsensus var.
Müharibə heç bir səngimə əlaməti göstərmədiyi və Rusiya hərbi hücumunun sürət qazandığı bir vaxtda diqqət Kiyevə ortamüddətli yardım göstərməyə və Moskvaya G7 müttəfiqlərinin lazım olduğu qədər Ukraynanı dəstəkləməyə hazır olduğuna dair güclü siqnal göndərməyə yönəldi.
Söhbət təkcə Ukraynanın öz müdafiəsini maliyyələşdirməyə və borclarına xidmət göstərməyə davam edə bilməsini deyil, həm də 2025-ci ildə və ondan sonrakı illərdə davamlı maliyyə dəstəyi ala bilməsini təmin etməkdir.
Aİ ayrıca Ukraynaya ildə iki dəfə dondurulmuş vəsaitlərdən əldə edilən gəlirlə təmin etməyə razılaşıb. ABŞ bu mənfəətdən Kiyevi qabaqcadan daha çox pulla təmin etmək üçün istifadə etməyə çalışır və gələcək gəlirlər bu xərcləri qarşılayır. Dondurulmuş aktivlərin ildə təxminən 5 milyard dollar gəlir əldə edəcəyi gözlənilir. G7 razılığa gəlsə, bu razılaşma Aİ təşəbbüsünü əvəz edəcək.
Aktivlərdən qabaqcadan gəlir əldə etməyin üstünlüyü ABŞ prezident seçkiləri ilə bağlı siyasi qeyri-müəyyənlikdən asılı olmayaraq, Ukraynaya fayda təmin etmək olardı. Vaşinqtondakı fikir ayrılıqları artıq prezident Co Baydenin Ukraynaya daha çox yardım göstərməsini çətinləşdirib və onun rəqibi, keçmiş prezident Donald Tramp Kiyevin dəstəyinə şübhə ilə yanaşıb.
Xatırladaq ki, G7 müzakirəçiləri bir neçə həftədir ki, Moskvanın 2022-ci ilin fevralında Ukraynaya müdaxiləsindən sonra dondurulmuş təxminən 300 milyard dollar dəyərində Rusiya aktivlərindən ən yaxşı şəkildə necə istifadə olunacağını müzakirə edirlər.
Birləşmiş Ştatlar ümid edir ki, bütün G7 hökumətləri Ukraynaya 50 milyard dollar dəyərində avans kreditinin verilməsində iştirak edəcək, lakin Vaşinqton Aİ-nin Rusiya aktivlərinin dondurulmuş qalacağına dair zəmanəti şərti ilə bütün krediti təkbaşına götürməyə hazırdır.
Turan İSMAYIL
Bizi Telegram-da izləyin...
