Efiopiyada üç günlük matəm elan edildi - 257 ölü
![](https://img.redaktor.az/news/2024/07/photo_248546.jpg)
Efiopiya Federativ Demokratik Respublikasının Xalq Nümayəndələr Palatası ölkənin cənubundakı Geze Qofa bölgəsində baş verən sürüşmə nəticəsində həlak olanlar üçün üç günlük milli matəm elan edib.
Redaktor.az "TASS"a istinadən xəbər verir ki, bu barədə Efiopiyanın Fana radiostansiyası məlumat yayıb.
İyulun 22-də baş vermiş sürüşmə Efiopiya tarixindəki ən ölümcül sürüşmələrdən biri olub. BMT-nin Humanitar Məsələlər üzrə Koordinasiya Ofisinin məlumatına görə, ölənlərin sayı artıq 257 nəfərə çatıb və 500-ə çata bilər, evakuasiya isə bölgənin 15 mindən çox sakinini əhatə edə bilər.
Efiopiya hazırda iyul ayında başlayan və sentyabrın ortalarına qədər davam edəcəyi gözlənilən yağışlı mövsümün ortasındadır. Şərqi Afrika ölkəsinin bəzi yerlərində davamlı yağışlar bəzən sürüşmələrə səbəb olur.
Yusif EYVAZLI