Britaniya qırıcı təyyarələrin hazırlanmasından imtina edə bilər
Böyük Britaniya hökuməti büdcə məhdudiyyətlərinə görə xərcləri azaltmaq cəhdi ilə yeni nəsil qırıcının hazırlanmasından imtina edə bilər.
Redaktor.az xəbər verir ki, bu barədə “The Times” qəzeti mənbələrə istinadən məlumat yayıb.
Qeyd olunub ki, Britaniya hakimiyyəti oktyabr ayında büdcə açıqlamasında müdafiə proqramları üçün maliyyənin azaldılmasını elan edə bilər. Nəşrin yazdığına görə, Böyük Britaniya hökumətinin hərbi ehtiyaclar üçün xərcləri artıracağını və 2030-cu ilə qədər müdafiə xərclərinin ÜDM-in 2,5%-nə qədər artmasına nail ola biləcəyini güman etmək üçün heç bir əsas yoxdur. Qəzet qeyd edib ki, Böyük Britaniya Müdafiə Nazirliyi dəyəri 50 min funt sterlinqdən (65 min dollar) çox olan bütün layihələrin auditini aparır.
Avqustun 27-də baş nazir Kir Starmer bildirib ki, ölkə iqtisadiyyatı gözləniləndən də pis vəziyyətdədir. O, bununla bağlı bir sıra vergilərin artırılmasına eyham vuraraq hökumətin ağrılı tədbirlər görməyə məcbur olacağını qeyd edib. Starmer qeyd edib ki, iyulun 4-də keçirilən parlament seçkilərindən sonra qurulan Leyboristlər hökuməti mühafizəkarlardan 22 milyard funt sterlinq (29 milyard dollar) büdcə “qara dəliyi” miras alıb.
Xatırladaq ki, 2022-ci ilin dekabrında Böyük Britaniya, İtaliya və Yaponiya 2035-ci ilə qədər hazır olmalı olan yeni nəsil döyüş təyyarəsinin birgə hazırlanması barədə razılığa gəliblər. Tempest (London və Roma) və F-X (Tokio) proqramları ümumi adı GCAP (Qlobal Döyüş Hava Proqramı) altında birləşdirildi. Layihə ABŞ və Aİ-nin inkişaflarına alternativ olacaq qırıcının yaradılmasına yönəlib.
Bundan əvvəl Böyük Britaniyanın Müdafiə Nazirliyinin rəhbəri Con Healey bildirmişdi ki, o, hərbi xərclərin ÜDM-in 2,5%-nə (hazırda ÜDM-in təxminən 2,3%-i) qədər artırılmasının tərəfdarıdır. Eyni zamanda o, Londonun bu məqsədə hansı ilə çatmağı planlaşdırdığını dəqiqləşdirməyib.
Turan İSMAYIL
Bizi Telegram-da izləyin...
