Macarıstanda silahlı aksiya təşkil etməyə cəhd edən şübhəli şəxs saxlanıldı
Macarıstanın hüquq-mühafizə orqanları oktyabrın 23-də qeyd olunan 1956-cı il Macarıstan qiyamının ildönümünə həsr olunmuş ölkədə silahlı aksiya təşkil etməyə cəhddə şübhəli bilinən şəxsi saxlayıb. Budapeşt Baş Prokurorluğunun məlumatına görə, onu 10 ilə qədər həbs cəzası gözləyir.
Redaktor.az-ın TASS-a istinadla məlumatına görə, prokurorluq qeyd edib ki, şübhəli şəxs "xarici tərəfdaş qurumlardan birinin siqnalı əsasında" polislə Terrorla Mübarizə Mərkəzinin birgə əməliyyatı zamanı saxlanılıb. “Şəxsin konstitusiya quruluşuna qarşı cinayətləri təşkil etməkdə şübhəli bilinməsi üçün əsaslar var və buna görə qanunla onu 5 ildən 10 ilədək müddətə azadlıqdan məhrumetmə cəzası gözləyir”, - deyə idarənin açıqlamasında bildirilir.
Prokurorluğun tələbi ilə məhkəmənin həmin şəxsin həbsinə qərar verəcəyi gözlənilir. Onunla bağlı təfərrüatlar verilmir. Bu işlə bağlı hüquq-mühafizə orqanları tərəfindən saxlanılan daha bir neçə nəfər var.
Bundan əvvəl ölkə hökuməti bəyan etmişdi ki, Macarıstan kəşfiyyat xidmətləri ABŞ-dən olan həmkarlarından 1956-cı il hadisələrinin növbəti ildönümünə həsr olunmuş hökumət əleyhinə silahlı aksiyanın mümkün hazırlanması barədə məlumat alıblar. Amerikalılar bildiriblər ki, Macarıstanda “onlayn qruplardan birində gənclər müdafiə olunan şəxslərə qarşı yaxın gələcəkdə planlaşdırılan aksiyanı müzakirə edirlər”. Əməliyyat zamanı əldə edilən məlumata görə, "gənclər bu aksiya zamanı silah alıb istifadə etməyi planlaşdırıblar", - hökumət qeyd edib. Ötən həftə sonu Macarıstan Terrorla Mübarizə Mərkəzinin əməkdaşları paytaxt meyxanalarının birində bir qrup gənci saxlayıb, onlardan pnevmatik silahlar müsadirə edilib.
Xatırladaq ki, 23 oktyabr Macarıstanda 1956-cı il azadlıq üsyanının anım günü kimi qeyd olunur. 68 il əvvəl ölkədə sovet qoşunları tərəfindən yatırılan sosialist rejimini devirməyə cəhd edilib. Bu üsyan sovet tarixinə “1956-cı il Macarıstan hadisələri” kimi düşüb. Bu il oktyabrın 23-də Macarıstanın Baş naziri Viktor Orban Budapeştdəki Millenarian parkında ölkə vətəndaşları qarşısında açıq ərazidə çıxış etməyi planlaşdırır.
Turan İSMAYIL
Bizi Telegram-da izləyin...
